Taian Areru 74 - Te B'aib'ara

Te Tataro I Bukini Kamaiuan Te Botannaomata

(Ana Otooto Ataba)

¹ Te Atua, Ko aera ngkai Ko kitanira n te aro aio? E na toki ningai unim irouia am Aomata?

² Ururinga am Bootaki n aomata, ae Ko rineia ngkoa i bukim, Ae Ko kainaomataia man te tautoronaki b'a a na riki b'a am Aomata. Ururinga te maunga are Tion, are nem ni maeka.

³ Ko na nakonako n toutou aoni baika urubekebeke aikai; A urui b'aai ni kabane n te Tembora ara kairiribai.

⁴ A takaakaa n tokanikai am Kairiribai i nanon am Tembora; A katioi aia buraeki ikekei b'a kaotan aia tokanikai.

⁵ Ai aron taraaia taani korokai ngkana a korei kaai ni kab'akai n aia angaraa

⁶ A kamanenai angaraa ma aama ake a buubura n urui kaina ake a korokoreaki aoia ni katamaroaaki.

⁷ A urubekebekea am Tembora ao a kabuokia; A kam'araea nem n tataromauriaki.

⁸ A taku i nanoia, Ti na kabane n uru! A kabuoki ni kabane nen te Atua n taromauriaki i aon te aba.

⁹ Akea kanikina aika kamimii aika ti noori; akea nikiraia burabeti n tiku; Ao akea temanna ae ataa maanin tain te aro aio.

¹⁰ Te Atua, ai ti maanraa aia tai ara kairiribai ni ngareakiniko? A na toki ningai n taekiniko n te aro n iowawa?

¹¹ Ko aera ngkai Ko rawa ni buokira? Ko aera ngkai Ko a tau baim i akuum?

¹² Ma Ngkoe, te Atua, bon ara Uea ma ngkoangkoa; A m'aiti am Tai ni kamaiura.

¹³ Ko bwenaua taari ni m'aakam; Ao Ko ibei atuia baika maiu aika kakamaaku ake i marawa;

¹⁴ Ko kamanatuai atuia Ribaietan, Ao Ko anga rab'atana b'a kanaia manin te rereua.

¹⁵ Ko kaawa nako ranin taiani karaanga ma koburakenran; Ko kakeai ranin karaanga aika ab'ab'aki.

¹⁶ Ko karika te ngaina ma te bong; Ko kaaki nam'akaina ma taai ni neia;

¹⁷ Ko bairea tian aon te aba are na toki iai; Ko karaoa bongin te aumaiaki ma te aumeaang.

¹⁸ Ma Ko na uringnga, te Atua, b'a a ngareakiniko am Kairiribai, Ao akea onimakinam ma karineam irouia.

¹⁹ Tai kaaki taekani maiuia am Aomata aika kananoanga i nanoni baiia aomata aika kakam'arua. Tai m'aninga taekaia am Aomata aika b'ainikirinaki.

²⁰ Ko na ururinga te boraraoi are Ko karaoia ma ngaira. A toa taabo nako aika roo i aon te aba ni m'akuri ni kakiriwe.

²¹ Tai karaoa ae a na b'ainrang iai akana karawaawataaki; A bia kamoamoa aram akana kananoanga ma akana a kai nanoia.

²² Te Atua, teirake, ao taetae i bukim! Uringiia aomata ake akea karineam irouia ni ngareakiniko n te bong koraki.

²³ Tai m'aninga taekani b'anaaia n takaarua n un aiam, Are karongoaaia ae e aki tootoki bukina.