Taian Areru 72 - Te B'aib'ara

Te Tataro I Bukin Te Uea

(Ana Areru Toromon)

¹ Te Atua, Ko na reireina te uea am Motikitaeka ae Eti, Ao buokanib'ai ma ngaia n am Kaetitaeka ae e raoiroi,

² B'a e aonga n tautaekaniia am Botannaomata n te eti, Ao n tau aroia am Aomata akana b'ainikirinaki n te babaire ae raoiroi.

³ E bia roko marin aon te aba, ao e bia namakinaki te kaetitaeka ae eti.

⁴ E bia motiki taekaia akana kananoanga te uea ma te aki nanonano; E bia buokiia akana a kai nanoia, ni katoki tabareia akana a iowawa nakoia.

⁵ A bia teimatoa n toro iroum am Botannaomata n ai aron teimatoan taai ni kaotiota ootana, ao n ai aron naba nam'akaina n angaanga ootana nakon rooro ma rooro.

⁶ E bia riki te uea b'a kanga ai aron te karau ae b'aka ni kamaiu kain am'arake, ao ni kam'aim'aa aon te aba.

⁷ E bia rikirake te maiu ae e raoiroi irouia aomata i nanon ana tai ni maiu, Ao e bia teimatoa rereken te kab'aia irouia aomata n ai aron teimatoan nam'akaina n angaanga ootana.

⁸ E na raababa nako ueana nakon tokin tiani marawa, ao man te karaanga are te Iuberetiti nakon tokin tabon aonnaba.

⁹ Ane a na bobaraaki i matana ni karinea akana maeka n te rereua; Ane a na tae aia kai taan ribaia.

¹⁰ Ane a na anganna b'aai n akoi uean Tibein ma abam'akoro; Ane a na uoti naba nakoina b'aai n tituaraoi uean Tieba ma Teba.

¹¹ Ane a na bane uea ni bobaraaki i matana ni karinea; Ao ane a na bane n toro i rouna botannaomata.

¹² E kamaiuia akana kananoanga akana tangira ana buobuoki, ma aomata naba akana b'ainikirinaki ao akana a kakaki taekaia.

¹³ E nanoangaia akana mamaara ma akana akea aia b'ai, Ao e kamaiuia akana a kai nanoia.

¹⁴ E kamaiuia man te karawawataaki ao man te b'ainikirinaki; A kakawaki i rouna maiuia.

¹⁵ E na tei maan maiun te uea! E bia anganaki te koora mai Tieb'a; A bia tatataro i bukina aomata; E bia kakab'aiaki iroun te Atua n taai nako!

¹⁶ A bia bati uaa i aon te aba; A bia kirimto uaa i aon tabuki, n ai aron uaan aon Reb'anon. A bia kaonaki nanoni kaawa irouia aomata, n ai aroni kaonan aon te aba n uteute.

¹⁷ E bia ururingaki arana n aki toki; E bia teimatoa ataakin arona kanga ai aron teimatoan taai. A bia butia te Atua botannaomata nako b'a E na kakab'aiaia, n ai arona ngke E a tia kakab'aia te uea.

¹⁸ Kamoamoa te UEA, ae Atuan Iteraera! Ti Ngaia ae karaoi m'akuri aika kamimii aikai.

¹⁹ Kamoamoa n aki toki arana ae mimitong! E bia buta aonnaba ni mimitongina. Amen! Amen!

²⁰ Aio tokin ana tataro Tawita are natin Iete.