Taian Areru 70 - Te B'aib'ara

Te Tataro i bukin Ana Buobuoki te UEA

(Ana Areru Tawita; ana b'ai aia Mataniwi taan anene; te tanginiwenei)

¹ Te Atua, Ko na kamaiuai! Te UEA, Ko na bareiko ni buokai!

² A bia konaaki ma ni bure toroia akana kan anaa maiu. A bia kabirinakoaki ma te b'ainrang akana kani kam'aruaai.

³ A bia rairaki n oki nako i bukini mamaaia te koraki akana b'ainingareai.

⁴ A bia bane ni kakatonga ma ni kukurei iroum akana nakoim; A bia aki toki akana tangira am Kamaiu ni kaangai, “Ai kakannatora te Atua!”

⁵ I kananoanga ao e kai nanou; Te Atua, Ko na bareiko n nako iu. Boni Ngkoe te tia buokai ao te tia kamaiuai; te UEA, tai tab'ara ma buokai!