Taian Areru 7 - Te B'aib'ara

Te Tataro i bukin te Motikitaeka ae eti

(E koreaki iroun Tawita, ao e aneneia nakon te UEA i bukini Kuti are man te baronga are Beniamin.)

¹ Te UEA ae Atuau, bon te tia kamanoai Ngkoe; Ko na kamaiuai mairouia taani kaeai ni kabaneia.

² B'a rimwi a na raebitiai kanga te raian ngkana e raebitia konana, ao akea ae e kona ni kamaiuai.

³ Te UEA ae Atuau, I aki ataia b'a I bure ke I aki!

⁴ I tuai kam'anea raoraou ke ni iowawa nakon au kairiribai n akea bukina.

⁵ Ngkana I a tia ni karaoa aron aei, ao a na kaeai au kairiribai ao N na reke irouia. A na toubekaai ni karokoa mateu ao a na katukai i buakon bubun aontano.

⁶ Te UEA, Ko na un; Karaoa te m'akuri teuana! Eekinakoia au kairiribai. Ao taraia b'a e na karaoaki te kaetitaeka ae eti.

⁷ Karokoia aomata nakoim ngkae Ko tekateka i aon am Kaintokanuea n tautaeka i aoia ni kabaneia.

⁸ Te UEA, motikitaekaia botannaomata! Motika taekau, ao kaotai nakoia te koraki ae I b'aab'aina te koaua, ao I aki ataia b'a I bure ke I aki.

⁹ Bon te Atua ae ko raoiroi ngkoe ae ko motiki taekan ara iango ma nanora. Katoki aia m'akuri aomata aika buakaka ao kakab'aiaia akana a kaakaraoa ae e raoiroi.

¹⁰ Ngkoe, te Atua, bon otangau, ao kamanoaia aomata ni kabane ake a raraoi nanoia.

¹¹ Te Tia Motikitaeka ae e raoiroi te Atua, ao E riiribaa te buakaka n te bong ae koraki.

¹² Ngkana a rawa aomata n rairaki man aroia, ao E na kakangiia ana kabaang te Atua, ao E na kab'aoua ana kainikatebe ni katauraoia.

¹³ E katauraoi ana b'ai ni buaka aika a kamaamate.

¹⁴ Te aomata ae buakaka kanga ai aron te aine are nangi bungia natina ae te tia iowawa ao te tia kewe, ao te tia kakaitaraa naba.

¹⁵ E kena te kinono b'a ana b'ai ni kam'aam'ane, ao e a manga boni m'ane iai.

¹⁶ B'a e na boni b'akaraki ni mwin oin ana m'akuri ae e buakaka, ao e na ikoaki ni mwin oin ana iowawa.

¹⁷ N na katituaraoiko te UEA! I bukin arom ae e raoiroi; ao N na anenea taekam are moan te rietaata Ngkoe.