Taian Areru 59 - Te B'aib'ara

Te Tataro ni Bubuti te Kani Kamaiuaki

(I bukin aia Mataniwi taan anene; n te b'ana ae Tai Ururu; ana Areru Tawita: ngke e tua Tauro b'a e na teiakinaki mwengan Tawita b'a e aonga ni kamatea)

¹ Atuau, Ko na kamaiuai mairouia taan ribaai. Kamanoai mairouia akana eekainako!

² Kamaiuai mairouia aomata ake a buakaka akekei ake a kani kam'aruaai.

³ Ao noriia, akana karabaia n tataninga b'a a na kam'aneai ni kamateai. Akana botiia aia koraki ni kakam'arua b'a a na kamateai. B'a akea te bure ke te kaairua ae I a tia ni karaoia,

⁴ Ke te b'ai ae I bure iai b'a e buakaka, te UEA, ao ni kabaikoaia nakon aia tabo.

⁵ Tei rake, te UEA ae Moan te M'aaka, ao nako mai buokai; Atuan Iteraera, nako mai noria Ngkoe! Kamarurungko, ao kareke kaiia botannaomata aika beekan; Tai nanoangaiia ngkai bon taani kam'aruaia raoia nakoia aiaia!

⁶ A oki n te tairiki, ao a karongoaea te aba kanga ai aroia kamea aika aiwaa ni karongoa i nanon te kaawa.

⁷ Ongora ni b'anaaia ni kamaraki nano. Ai aroni kabaang neweia i nanoni wiia, ao a taku n aia iango b'a akea ae e ongo b'anaaia.

⁸ Ma Ngkoe, te UEA, Ko ngareakiniia; Ko kakanikoia botannaomata aika beekan.

⁹ I mwioko ni korakoram; Te Atua, boni nneu ni katantan Ngkoe.

¹⁰ E tangirai Atuau ao E na nako iu; E na kairai b'a N na noriia taan ribaai ngkana a tae aia kai.

¹¹ Te Atua, tai kamateia, b'a a kaawa au aomata ni m'aninga taekan am Tokanikai. Kauamaenakoia ni m'aakam ao katae aia kai, te Uea ae te tia kamanoira.

¹² A bure n aia taeka ni kabane: Ke a m'ane n aia kainikatonga. Ao i bukin aia karereanti ma kewekewe,

¹³ Ko na kamateia n unim, n akea ae na tiku ni maiu; Ao ane a na ataia aomata nako b'a E tautaeka te Atua, i aoia Iteraera ao ana tautaeka e raababa nako nakon ni kabutaa aonnaba.

¹⁴ A oki taan ribaai n te tairiki, ao a karongoa n ai aroia kamea aika aiwaa i nanon te kaawa:

¹⁵ Ai aroia kamea aika aiwaa ni kakaaei kanaia, Ao a tatangitang ni kaota aki raun nanoia ngkana e aki tau m'aitini kanaia.

¹⁶ Ma ngai N na anenea taekani m'aakam; N na kanenea b'anaau n te ingabong koraki i bukin am tangira ae teimatoa. B'a Ko a tia n riki b'a nneu ni kamanomano ao ni katantan n te bong ae e kai nanou iai.

¹⁷ N na neboiko, te tia kamanoai. Boni nneu ni katantan te Atua, ae Ngaia ae tangirai.