Taian Areru 53 - Te B'aib'ara

Aomata ake a Taku b'a Akea te Atua

(Ana Areru Tawita i bukin aia Mataniwi taan anene.)

¹ E taku te nanobaba i nanona, “Akea te Atua.” Aomata aika aroia aio bon aomata aika a bure aroia, Ao a karaoi baika bati n ribaki: akea temanna ae karaoa ae e raoiroi.

² E baraaki te Atua mai karawa n tarataraia aomata, ni kan noriia b'a antai i buakoia ae wanawana ae ukoukora te Atua.

³ Ma bon akea i buakoia, bon akea naba temanna: A bane ni bure aroni maiuia.

⁴ E taku te Atua, “A aki ataia?” A nanoroo nakana taani kakaraoa ae buakaka? A maiu mani kurib'aiaia au aomata, Ao a tuai man tataro nako iu.

⁵ Ma ane kam na taonaki n te maaku ae korakora ae akea n ai arona rimoa. Te Atua e na kamaenakoi riia aia kairiribai ana aomata ao ko na bon mamaa ngkana e aki butim'aiko te Atua.

⁶ E bia reke maiuia Iteraera mai Tion! Ai kukurei ra Iteraera ngkana E a manga kakab'aiaki iroun te Atua! Ana kim'areirei ana utu Iakob'a ao ana kukurei Iteraera.