Taian Areru 49 - Te B'aib'ara

Tai Onimakina te Kaub'ai

(Te Areru i bukiia ana aomata Koora, ao i bukin aia Mataniwi taan anene)

¹ Kam na bane n ongora n aei, ngkami botannaomata! Katanimai taningami, ngkami aomata n taabo nako,

² akana kam mangori ma akana kakannato, ao ngkami naba akana kam kaub'ai ma akana akea ami b'ai.

³ E na atong taeka n rabakau wiiu, Ao e na reke te ataib'ai man taeka aika nako mai nanou.

⁴ N na kakauongo nakon taeka n rabakau; ao N na kab'arab'arai nanoia ngkai I katanga te aabi.

⁵ Bukin tera b'a N na maaku ni boong aika bubuaka, Ngkana I otab'aniniaki irouia aiau aika iowawa?

⁶ Aomata ngaiia aika onimakini kaub'aia Ao a kamoamoaia n aia b'ai aika bati.

⁷ Akea ae e kona ni kaboa maiuna, Ke n angan te Atua booni maiuna:

⁸ B'a akea boona ae tau ni kaboaki iai, aron kaokan maiuna ko bon aki kona naba ni kabooa te Atua

⁹ iroun ane e rawa ni kani mate, ane e kani maiu n aki toki.

¹⁰ Ti kakoaua b'a a mate naba aomata aika wanawana; Ai aroia naba aomata aika nanobaba mani bangab'ai b'a a mate ao a tiku aia b'ai i mwiia nakoia aia bakatibu.

¹¹ E riki te ruanimate b'a neia n aki toki, A tiku iai n taai nako, ngke bon iai ngkoa oin abaia.

¹² E aki kona kakannaton te aomata n tuka matena; E na boni mate naba n ai aroia maan.

¹³ Aio tokiia akana onimakiniia i bon irouia, Ao aroia naba akana onimakin taeka n nanobaba:

¹⁴ A motikaki bukiia b'a a na mate n ai aroia tiibu; E na riki te mate b'a te tia kawakinia n ai aron te tia kawakin-tiibu, are na kairiia nakon te ruanimate. A na tauaki aroia n te ingabong irouia akana raoiroi, ngkai a waekoa ni mka rab'ataia n te ruanimate, ike e raroa nako mani mwengaia.

¹⁵ Ma E na kamaiuai te Atua; E na kamaiuai mani m'akan te mate.

¹⁶ E na aki rawaawata nanom ngkana e riki ni kaub'ai temanna, Ngkana e rikirake ni bati kaub'aina;

¹⁷ E aki kona n uotia nako ngkana e mate; E aki kona n airi ma kaub'aina nakon te ruanimate.

¹⁸ E ngae ngkana e rauaki nanon te aomata ni maiuna, Ao e kamoamoaki b'a e tetekeraoi ni maiuna,

¹⁹ Ma e na boni bootaki naba ma ana bakatibu ngkana e mate, ike a aki kona ni manga nora iai te oota.

²⁰ E aki kona kakannaton te aomata n tuka matena; E na mate n ai aroia naba maan.