Taian Areru 48 - Te B'aib'ara

Ana Kawa te Atua

(Te Anene, ae te Areru i bukiia ana aomata Koora)

¹ E kakannato te UEA, ao E na bati ni karaoiroaki n ana kaawa are maeka iai, i aon ana Maunga are tabu.

² E rietaata ao e tamaroa Tion, ae ana maunga te Atua; ana kaawa te uea ae kakannato ao e kakukurei nakoia aomata nako i aonnaba.

³ E a tia te Atua ni kaotia b'a te nne ni kamanomano i nanon nonon te kaawa.

⁴ A bootaki uea b'a a na buakana te kaawa,

⁵ Ma ngke a noria ao a mimi iai; A maaku ao a biri nako.

⁶ A taonaki n te maaku ae korakora, kanga ai aroia aine aika nangi bung;

⁷ Kanga ai aroia kaibuke ake a uruaki n te ang ae e rangi ni matoatoa karena.

⁸ Ti a tia n ongo taekan te baere E karaoia te Atua, Ao ti a tia n noria ngkai n ana kaawa Atuara, ae te UEA ae Moan te M'aaka; E na kawakina te kaawa n taai nako b'a e na aki kabuanib'ai.

⁹ Te Atua, ti iangoa am Atataiaomata i nanon am Tembora.

¹⁰ Aron aram ngkae e ataaki n taabo nako, Ao ai aron naba katituaraoam ni buta nako i aonnaba ni bane, ngkai a reke am Tokanikai ni m'aakam.

¹¹ A na kakatonga kaain Tion! Ao a na kim'areirei kaain Iuta i bukin am Babaire aika eti.

¹² Ti na nakonako ni katobibia Tion, Ao wareki m'aitin tauana nako.

¹³ Ti na noori oona aika matoatoa, Ao ni karoko n nonona; Ao kam a kona ni kaangai nakoia rooro aika na roko,

¹⁴ Aio aron Atuara n aki toki; E na kairirira n taai nako.