Taian Areru 47 - Te B'aib'ara

E Tautaekaniia Botannaomata te Atua

(Te Areru i bukiia ana aomata Kora; ana b'ai aia Mataniwi taan anene)

¹ Uboubo ni kukurei, ngkami aika botannaomata! Takaakaa ni kamoamoa te Atua.

² B'a E kakamaaku te UEA are Moan te Rietaata; bon te uea ae kakannato, e tautaeka i aonnaba.

³ E anganira te tokanikai i aoia natanaomata; E katautaekaira i aoia botannaomata nako.

⁴ E rinea abara i bukira, ae aia b'ai ni kamoamoa ana botannaomata ake E tatangiriia.

⁵ E rierake te Atua nakon ana kaintokanuea, A takaakaa ni kukurei aomata ao a katangaki bu ngke E rierake te UEA.

⁶ Kam na anenea karaoiroan te Atua; aneneia; Kam na anenea karaoiroan ara Uea, aneneia;

⁷ B'a bon Uean aonnaba ni bane te Atua; Kam na anenea te anene i bukini karaoiroana.

⁸ E tauu taekaia botannaomata te Atua; E tekateka i aon ana kaintokanuea are tabu.

⁹ A bane ni bootaki aia uea natanaomata ma ana botannaomata te Atua are Atuan Aberaam; B'a ana b'ai te Atua uea n aon te aba; ana katikui aia b'ai ni buaka E raka aroni karineana.