Taian Areru 45 - Te B'aib'ara

Anenen te Iein i bukiia Uea

(Te Areru i bukiia ana aomata Kora: ana b'ai aia Mataniwi taan anene)

¹ E onrake atuu n taeka aika tamaroa ngkai I otea te kuna aio i bukin te uea. Ao N na kabongana b'anaau n ai aroni kabonganan te kai ni koroboki iroun te aomata ae rabakau ni koroboki.

² Te kabanea ni botonim'aane ngkoe; Te tia taetae ngkoe ae ko wikateke. E aki toki ni kakab'aiako te Atua.

³ Kabaea am kabaang i rarikini babatim, ngkoe ae ko ninikoria; ko mimitong ao ko karineaki.

⁴ Ko na buti ma te mimitong i aoni baom nakon te tokanikai, i bukin te koaua, te nanoanga, ao te eti. A na reke am tokanikai aika ab'ab'aki i bukini korakoram.

⁵ A kakang kanoan am kainikatebe; A ewari buroia aiam; A b'aka botannaomata i rarikini waem.

⁶ E na teimatoa n aki tootoki ueam are E a tia n anganiko te Atua; Ko tautaekaniia am aomata ma te eti;

⁷ Ko tangira te maiu ae e raoiroi, ao ko riba ae buakaka. Ao anne bukin ae E rineiko iai te Atua, ae Atuam; Ao E karaoiko b'a ko na kukurei riki nakoia uea nako.

⁸ A bane niiniiram ni boiarara ni boini b'aa aika boiarara; A kakukureiko taani katangitang n aia b'ai ni katangitang i nanon auti aika bareti aika katamaroaaki ni koroia ereb'anti.

⁹ I buakoia aine n am katawanang bon natiia uea, ao i angaatain am kaintokanuea ao e tei iai te ueanaine, ni katokai i aona b'aai ni katamaroa aika karaoaki man te koora ni koaua.

¹⁰ Ngkoe ae buun te uea, ongora n te b'ai ae N na taekinna: M'aninga taekaia am botannaomata ma am utu.

¹¹ E na tangiriko te uea i bukin tamaroam; am mataniwi ngaia, ma ngaia ae ko riai n ongeaba i rouna.

¹² Ane a na nikiri b'aintangira I-Turo nakoim; Ao ane a na kataia akana kaub'ai n iangoa reken ae ko na tatangiriia.

¹³ E mena te aine are na iein ma te uea n te bareti-ai botonaine ra! E karaoaki ana kunnikai n te karai ae te koora.

¹⁴ E kairaki nakon te uea ma kunnikaina ae mataraoi i aona; Ao e iraki nakon te uea irouia taani katoa aika aine, ao ni uotaki naba ngaiia nako ina.

¹⁵ A roko ma te kim'areirei ao te kukurei ao a rin n ana bareti te uea.

¹⁶ Ane a na riki natim ma tibum b'a taan onei mwiia am bakatibu n riki b'a uea; Ao ko na katautaekaia i aon aaba ni kabane.

¹⁷ N na karaoa ae e na ururingaki aram n rooro nako; Ao a na bane aomata nako ni kamoamoako n aki tootoki.