Taian Areru 44 - Te B'aib'ara

Te Tataro i bukin te i Buobuoki

(Ana b'ai Mataniwiia taan anene; ao i bukiia ana aomata Kora)

¹ Te Atua, ti ongo n taningara, Ti kaongoaki irouia ara bakatibu taekan am M'akuri ake Ko karaoi ni boong ake ngkoangkoa:

² Ngke Ko kakioia nako botannaomata ni m'aakam, Ao Ko kamaekaia ara bakatibu i aon abaia; Ko karawawataia, ao Ko kakab'aiaia ara bakatibu.

³ E aki reke te aba irouia ara bakatibu n aia b'ai ni buaka; Ao e aki reke irouia n oini korakoraia; E reke ni m'aakam ao ni korakoram: mani kakoauaan memenam irouia ni kaotia b'a Ko tangiriia.

⁴ Bon au Uea Ngkoe ao Atuau; Ko karekea te tokanikai nakoia ana aomata Iakob'a;

⁵ ao ti tokanikai i aoia aiara ni m'aakam.

⁶ I aki onimakina kanoan au kainikatebe, Ke au kabaang b'a e na kamaiuai.

⁷ Ma Ko kamaiura mairouia aiara, Ao Ko katokanikaira i aoia ake a riribaira.

⁸ Ti na kamoamoako n taai nako Ao ni katituaraoiko n aki toki.

⁹ Ma Ko a ribaira ao Ko katokanikaia aiara i aora; Ao Ko a aki kairiia ara taanga ni buaka.

¹⁰ Ko kabirinakoira mai m'aaia aiara, Ao a anai ara b'ai b'a aia b'ai.

¹¹ Ko anga ngaira b'a kanga tiibu nakon te kamateaki; Ko kamaaenakoira i buakoia botannaomata.

¹² Ko kaboonakoia am Aomata n te boo ae uarereke ke ae akea booia, n akea am raka iai.

¹³ A noori baike Ko karaoi nakoira baronga ake a maeka i rarikira, Ao a kaenaenaira ma ni ngareakinira.

¹⁴ Ko karikira b'a b'ainingare irouia botannaomata, Ao a ioioi atuia nakoira.

¹⁵ E aki toki b'ainrangu; Ao e taonai te mamaa

¹⁶ n ongou ni b'anaaia aiau ma ake a ribaai.

¹⁷ A bane n riki baikai nakoira, e ngae ngke ti tuai ni m'aninga taekam ke n urua te boraraoi are Ko karaoia ma ngaira.

¹⁸ Ti aki toki ni kakaonimaki nakoim; Ti ongeaba n taai nako nakon am Tua.

¹⁹ Ma Ko katikuira b'a kanga maate ngaira i buakoia maan aika aki manana; Ko kakiira n te tabo ae rotongitong.

²⁰ Ngke arona b'a ti katoka taromaurian Atuara ao n tataro nakon te atua ae Ianena,

²¹ Ao Ko na kamani kunea: b'a Ko atai nanora aika raba.

²² Ma ti kaitaraa ma te mate i bukim n taai nako, Ao ti riki b'a kanga tiibu aika nang kamateaki.

²³ Te UEA, Ko na uti! E aera ngkai Ko matu? Tei rake! Tai ribaira n aki toki!

²⁴ E aera ngkai Ko karabako mai roura? Tai m'aninga taekan rawawatara ma ara kaangaanga!

²⁵ Ti b'aka ni borarabaua i aontano; Ti wene n aki konab'ai i buakoni bubun aontano.

²⁶ Ko na nako mai ni buokira! Kaota am Atataiaomata ni kamaiura!