Taian Areru 37 - Te B'aib'ara

Onimakina te UEA

(Ana Areru Tawita)

¹ Tai kabonoa nanom irouia taani bure; Tai bakantang irouia akana karaoa ae buakaka.

² Ane a na waekoa ni mate n ai aron te uteute ke te aroka ae aki tetebokaki.

³ Onimakina te UEA, ao karaoa ae raoiroi; Ko na maeka ma te rau raoi i aon te aba.

⁴ Karaoa ae E tangiria te UEA, Ao E na anganiko te b'ai ae e tangiria nanom.

⁵ Kaki taekam i nanoni bain te UEA; Onimakinna ao E na buokiko.

⁶ E na kaota raoi koauan ae akea am bure, kanga ai aron itiakin ootan taai n te tawanou.

⁷ Taotaona nanom ao kaantaninga te UEA; Tai kabonoa nanom irouia akana rikirake kab'aiaia, Ke irouia akana kokoro bukin aia iango nako aika bubuaka.

⁸ Tai bono n nano ke n un; B'a e kona ni kairiko nakon karaoan ae buakaka.

⁹ A na abana te aba akana onimakina te UEA; ma a na kakioaki nako akana buakaka.

¹⁰ E na aki rangi ni maan ao a na mauna mataia akana buakaka; ae ko na kakaeia ma ko na bon aki kona ni kuneia;

¹¹ ma a na abana te aba akana aki kainikatonga, ao a na kim'areirei b'a a kab'aia ma n rau.

¹² E iangoaki kam'aruaan te aomata ae e raoiroi iroun ane buakaka; ao e kangengei wina nakoina.

¹³ Ma E ngareakiniia akana buakaka te UEA; b'a E ataa ae a nang kamaunaki.

¹⁴ A buuti aia kabaang aomata akana buakaka, ao a tauraoi ni kanakoi kanoan aia kainikatebe, b'a a na kamateia akana akea aia b'ai ma akana a kai nanoia; Ao a na tiringiia akana raraoi aroia

¹⁵ Ma ane a na boni mate n oin aia kabaang; Ao ane a na m'aototo aia kainikatebe.

¹⁶ E raoiroi riki te b'ai ae ti teutana, ae ana b'ai te aomata ae e raoiroi, nakon te kaub'ai ae bati, ae kaub'aia aomata aika buakaka.

¹⁷ B'a ane e na anai korakoraia akana buakaka te UEA, Ao E na buokiia akana raoiroi.

¹⁸ E tabeakin aroia akana ongeaba nako Ina te UEA, ao a na abana te aba n aki toki.

¹⁹ A na aki bo ma te kaangaanga ngkana a bubuaka kanoani boong; a na bati kanaia n tain te rongo.

²⁰ Ma a na mate akana buakaka; ane a na mauna akana riba te UEA, n ai aroni maunan tamaroan ueeni kaai: ane a na mauna n ai aroni bubun te ai.

²¹ E tatangob'ai te aomata ae buakaka, ao e aki kakaoki; ma e tituaraoi te aomata ae e raoiroi, ao akea tokin ana angaanga.

²² A na abana te aba akana kakab'aiaki iroun te UEA; ma a na kakioaki nako akana a reke kaiia i rouna.

²³ Ngkana e karaoa ae E tangiraki iroun te UEA te aomata, ao E na anganna te kona ni waaki ni maiuna ma te ninikoria.

²⁴ Ngkana e tata nako, ao e na aki b'aka. B'a E na taua baina te UEA.

²⁵ I a kara ngkai; I a tia ni maiu n te tai ae ananau, Ma I tuai n nora te aomata ae e raoiroi ni kitanaki iroun te UEA, Ke n noriia natina b'a a bubuti kanaia.

²⁶ Ti te anganga b'ai ma te nano n tituaraoi n taai nako, Ao a kakab'aiaki natina.

²⁷ Kitana te buakaka, ao karaoa ae raoiroi, ao a na mamaeka am kariki n taai nako n te aba ni berita.

²⁸ E tangira te kaetitaeka ae eti te UEA, ao E aki kitaniia ana Aomata aika kakaonimaki: E kakawakiniia n aki toki, ma a na kakioaki nako aia kariki aomata aika buakaka.

²⁹ A na abana te aba akana raoiroi, Ao a na maeka iai n aki toki.

³⁰ Iai te ataib'ai n ana taeka te aomata ae e raoiroi, Ao akea te nanonano iai.

³¹ E kawakina ana tua Atuana i nanona, ao e aki raure ma ngaia.

³² E tarataraa te aomata ae raoiroi te aomata ae buakaka, ao e ukoukora kamateana.

³³ Ma E na aki kaaki taekana te UEA i nanoni bain te aomata anne, ke ni kariaia motikan taekana b'a e bure ngkana e kabowiaki.

³⁴ Kaantaninga te UEA, ao ira nanona; E na karineko n anganiko te aba, ao ko na nora ane buakaka ni kakioaki nako.

³⁵ I a tia n nora te aomata ae kakaiowawaea nakoia tem'angina ao n rikirake ni korakora,; kanga ai aroni kain Reb'anon ae te tiira.

³⁶ Ma i mwina, ngke I rikekei, ao akea iai; I kakaaea, ma e aki reke.

³⁷ Kam'ataua raoi taraan te aomata ae e raoiroi ae b'aina te eti: b'a iai ana kariki te aomata ae rau maiuna;

³⁸ Ma a na bane ni kamaunaki taani bure, ao ai aroia naba aia kariki.

³⁹ E kamaiuia akana raoiroi te UEA, ao E kataniia n tain te kaangaanga.

⁴⁰ E buokiia ao E kamaiuia; E kamaiuia mairouia akana buakaka, b'a kioina ngkai a karabaia i rouna.