Taian Areru 35 - Te B'aib'ara

Te Tataro i bukin Ana Buobuoki te UEA

(Ana Areru Tawita)

¹ Te UEA, Ko na un ma aiau n un, ao ekianako nako akana eekainako!

² Anaa te otanga ae ab'ab'aki ma ae karako, ao nako mai buokai.

³ Katauraoa am kainiwai ma am angaraa n un ni kaitaraia akana kan rawea maiu, ao ni berita b'a ko na kamaiuai.

⁴ A na baka ni baba ma ni b'ainrang akana kani kamateai; A na oki rikaaki ma te nako n nano akana iangoa aroni kam'aruaau!

⁵ A na kakioaki iroun ana anera te UEA, ao a na riki n ai aroni kunin te uteute ae ukaki nako n te ang!

⁶ A na roo kawaia ma ni kamaranran n aia tai ni kakioaki iroun ana anera te UEA!

⁷ A katauraoa te b'ai ni kam'am'ane i buku ao a kena te kinono b'a N na b'aka iai

⁸ Ma ane a na taonaki n te kabuanib'ai ae na roko ni kakuba nakoia; Ane a na boni m'aane n aia b'ai ni kam'am'ane, Ao a na b'aka ni kabuanib'ai i nanon aia kinono.

⁹ Ao N na kakatonga i bukin te bae E a tia ni karaoia te UEA; N na kim'areirei b'a E a tia ni kamaiuai.

¹⁰ N na taetae ma nanou ni koaua ni kaangai, “Akea n ai arom: b'a Ko kawakinia akana mamara mairouia akana korakora, ao akana akea aia b'ai mairouia akana b'ainikirina te aba.”

¹¹ Iai ake a kewe n aia kaotioti i buku; Ao a bukinai b'a I karaoi m'akuri ni kakeru aika I aki atai.

¹² A kaboa mwin au m'akuri ae e raoiroi n te buakaka, Ao I taonaki n te rawaawata.

¹³ Ma ngke a aoraki, ao I kaota ae I rangi n nanokawaki; I kataua te aki mamatam; Ao I tataro ma te nanokawaki ae bati i bukiia,

¹⁴ N ai aron ae I tataro i bukin raoraou ke tariu. I nanakonako ni katobibi ni bobobaraki n tanginiwenei, N ai aron temanna ae b'ab'aeb'aeta nanona ni maten tinana.

¹⁵ Ma ngke I a reke n te kaangaanga, Ao a bane ni kukurei, ao a bootaki ni b'ainingareai; a oreai ake I aki kinaia, ao akea tokin aia oro.

¹⁶ Ai aroia aomata ake a b'ainingarea ae m'auku, ngke a kangengei wiia nako iu.

¹⁷ Te Uea, tao maanraa Ngkoe n tarataraai n arou aio? Kamaiuai mairouia raian aikai ngkana a eekainako!

¹⁸ Ao N na katituaraoiko n tain aia bootaki ae ab'ab'aki am Aomata; N na katituaraoiko i mataia ni kabaneia.

¹⁹ Tai kariaia taan ribaai, ake taani kewe, b'a a na ngareakinai; Ao a na tai katou mataia aiau akana akea bukin riribaakiu irouia.

²⁰ A aki taetae n i raorao; ma ti te karioi taeka ni kewe b'a taekaia ake a tatangira reken te rau.

²¹ A kaure wiia n takaarua ni kaangai, “Ti nora te baere ko karaoia!”

²² Te UEA, Ko noori b'aai nako! Ma ngaia ae tai kainab'aabu. Tai kararoako!

²³ Te UEA, kauti matam, ao buokai; Tei rake, te Atua ae au Uea, ao taetae i buku.

²⁴ Te UEA ae Atuau, kaeta taekau n ai aron am raoiroi, ao a na aki ngareakinai aiau.

²⁵ Tai kariaia b'a a na kangai i nanoia, “E a koro bukin are ti tangiria! B'a e a tia arona!

²⁶ A na baka ni baba ma ni bua aia iango akana ngareakinai n rawaawatau. A na taonaki n te mamaa ma te b'ainrang akana kamoamoaia n taku b'a a raoiroi riki nako iu.

²⁷ A na takaakaa ni kakatonga akana tangira kaetan taekau, Ao a na kaokioka atongan ae kaangai, “Ai kakannato ra te UEA! E kukurei nanona n ana tokanikai ana toro”

²⁸ Ao N na tataekina raoiroim, Ao N na neboneboiko ni kabongnga.