Taian Areru 33 - Te B'aib'ara

Te Anene ni Katituaraoi

¹ Ngkami akana kam raoiroi, kam na kim'areirei i bukini baika E a tia ni karaoi te UEA; neboia, ngkami aika kam ongeaba i rouna.

² Katituaraoa te UEA n tangin aabi; Anene nakoina ma b'ai ni katangitang aika iai karaia.

³ Anene nakoina n te anene ae boou; Kaoti rabakaumi ni katanga te aabi, ao kanene b'anaami ni kim'areirei!

⁴ A koaua ana taeka te UEA, ao a onimakinaki ana m'akuri ni kabane.

⁵ E tatangira te raoiroi ma te kaetitaeka ae riai te UEA; ana Tangira ae teimatoa e kaona aonnaba.

⁶ A karaoaki taiani karawa ma b'aai nako ake a mena iai n ana taeka te UEA.

⁷ E boboti ranin marawa n te tabo ae ti teuana; E kain taiani marawa i nanon ruu.

⁸ A na bane aonnaba n taromauria te UEA: A na bane ni karinea kaain aonnaba!

⁹ B'a E taetae, ao e riki aonnaba; E tua, ao a riki b'aai.

¹⁰ E uru aia iango botannaomata te UEA ake a tia ni bairei b'a a na karaoi, Ao E tukiia b'a a na aki kakoroi bukiia.

¹¹ Ma a teimatoa n aki toki ana baire, Ao a aki kona ni bibitaki.

¹² E a kab'aia te botannaomata ae Atuana te UEA; A kab'aia aomata akana E rineia b'a ana b'ai.

¹³ E tara aonnaba te UEA mai karawa, ao E noriia aomata nako.

¹⁴ E taraia aomata ni kabaneia ake a maeka i aonnaba man ana tabo are E tekateka iai ngkai te Uea n tii Ngaia.

¹⁵ E angania te iango, Ao E atai baika a karaoi.

¹⁶ E aki tokanikai te uea i bukina b'a e korakora ana taanga ni buaka; Ao e aki tokanikai te tautia i bukini korakorana.

¹⁷ A aki onimakinaki aoti b'a a na karekea te tokanikai n tain te buaka: A aki kona ni kamaiua te aba ni korakoraia ae bati.

¹⁸ Ma te UEA, E tatarataraiia akana karinea, Akana onimakina ana tangira ae teimatoa.

¹⁹ E kawakinia man te mate; Ao E kamaiuia n tain te rongo.

²⁰ A tiku ara kaantaninga iroun te UEA; Boni Ngaia otangara ao buokara.

²¹ A kim'areirei nanora i rouna, B'a kioina ngkai ti onimakina arana ae tabu.

²² E na memena am Tangira ae Teimatoa i aora te UEA, Ngkai a tiku ara kaantaninga i Roum.