Taian Areru 32 - Te B'aib'ara

Te Rairannano ao te Kab'arabure

(Ana Areru Tawita.)

¹ A kab'aia akana kab'araki aia bure, mani kamaunaaki aia kairua.

² E a kab'aia te aomata ane aki kabuakakaaki iroun te UEA, Ane akea naba te aro ni m'am'anaa te aba i rouna.

³ Ngke I aki kaoti au bure, Ao e mamara rab'atau i bukin tangu ni korakai ni kabongnga.

⁴ Ko karawawataai ni ngaina ao ni bong; ao E kerikaki n akea nikirani korakorau, n ai aron ae e m'auteretere ni kabuebueni bongin te aumeaang.

⁵ I kaoti au bure nakoim, Ao I aki karabai au kairua; I kataua te kaoti taekaia nakoim, ao Ko kab'arai au bure ni kabane.

⁶ Ma ngaia ae a riai akana tangiriko n tataro nakoim n taai ake a kai nanoia iai; Ao ngkana a roko kaangaanga b'a kanga ai aron rokon te ieka, Ao a na bon aki rotaki iai.

⁷ Boni nneu ni karabai Ngkoe; Ko na kamaiuai man te kaangaanga. I anene n takaruaea taekan am Kamaiu, I bukina b'a Ko kamanoai.

⁸ E kaangai te UEA, N na kaota te kawai ae ko na nako iai; N na riki b'a am Tia Reirei, ao N na tarataraiko.

⁹ Tai nanobaba n ai aron te aoti ke te miure ake a tangira kairakiia mani kabaean ubuia b'a a aonga n ongeaba.

¹⁰ Ane a na taonaki n te rawaawata aomata akana buakaka; Ma a na kawakinaki raoi akana onimakina te UEA n ana tangira ae teimatoa.

¹¹ Kam na kukurei ma ni kakatonga, ngkami akana kam raoiroi, i bukini baika E a tia ni karaoi te UEA. Ao takaakaa ni kakatonga, ngkami akana kam ongeaba i rouna!