Taian Areru 27 - Te B'aib'ara

Te Tataro n Nebo

(Ana Areru Tawita)

¹ Bon ootau ma au tia kamaiu te UEA; Akea ae N na makua. Bon nneu ni kamanoai te UEA man taiani kanganga nako; N na bon aki maaku.

² Ngke a eekainako aiau ma ni kataia ni kani kamateai, Ao a na bon tae aia kai mani b'aka.

³ E ngae ngkana I otab'aniniaki n te taanga ni buaka ae korakora, ma N na bon aki maaku; e ngae ngkana a buakanai aiau, ma n na bon teimatoa n onimakina Atuau.

⁴ Teuana te b'ai ae I butia iai te UEA, ae te b'ai ae I tangiria: b'a N na maeka n ana auti ni kabanea bongini maiu, ni mamatakuakina kamimiin raoiroina, Ao ni bubutiia ana kairiiri.

⁵ E na kawakinai ni kamanoai man te kaangaanga i nanon ana Tembora, ao E katokaai i aon te b'a ae rietaata ae N na maiu iai.

⁶ Ma ngaia ae N na tokanikai i aoia aiau aika otab'aniniai. N na angakarea i nanon ana um'antabu ma te b'ana ni kim'areirei; N na anene ni kamoamoa te UEA.

⁷ Te UEA, ongo irou ngkana I weteiko; Nanoangaai ao kaekaai!

⁸ E tuangai nanou b'a N na tataro. E ingainga nanou ni kan nora matam,

⁹ Ma ngaia ae tai karabako mairou. Ngai ae am Toro, te UEA Ko a tia ni buokai; Tai kitanai, tai taeanibai nako mai rou, Ngkoe ae te Atua, ae au Tia Kamaiu.

¹⁰ Tao a kona ni kitanai tamau ma tinau, ma E na m'aneai n akoai te UEA.

¹¹ Te UEA, reireiai te b'ai ae Ko tangiria b'a N na karaoia, ao kairiirai n te kawai ae e raoiroi, b'a a bati taan ribaai.

¹² Tai kariaia b'a a na karaoa ae a tangiria nako iu: b'a a karaoa ae kewe ibuku aomata ma n taetae n iowawa n eekainako.

¹³ I kakoaua b'a N na aki mate i m'ain ae I nora raoiroin te UEA n te maiu aei.

¹⁴ Ko na kaantaninga te UEA, Ko na korakora ma n ninikoria; Ko na kaantaninga te UEA.