Taian Areru 25 - Te B'aib'ara

Te Tataro i bukin te kani Kairaki ma ni Kakawakinaki

(Ana Areru Tawita)

¹ Te UEA, I tataro nakoim;

² Atuau, I onimakiniko; Buokai b'a N na aki mamaa ni konakiu; Tukiia aiau b'a a na aki b'ainingareai.

³ A aki kona ni konaaki akana onimakiniko irouia aiaia; ma ti te koraki ake akea nanoia b'a ti te kan ekiko nako.

⁴ Te UEA, Ko na kaoti arom nako iu; Ko na reireiai kawaim nako.

⁵ Reireiai b'a N na maiuakina am Koaua, B'a Atuau Ngkoe ae Ko kamaiuai. I aki toki n onimakiniko.

⁶ Te UEA, ururing arom n akoi ma n tangira ake ko a tia ni kaotii ngkoangkoa.

⁷ Kab'arai au bure ake I karaoi ngke te kairake ngai. Te UEA, ururingai n ai aron am Tangira ae teimatoa ma am Raoiroi!

⁸ I bukina b'a E raoiroi te UEA, ao E eti; E reireiia taani bure te kawai ae a riai n iria.

⁹ E kaiririia akana nimamannei n te kawai ae eti, ao E reireiia nanona.

¹⁰ N ana kakaonimaki ma ana tangira E kaiririia ake a kawakina ana boraraoi ma akana ongeaba nakon ana tua.

¹¹ Kawakina am berita, Te UEA, Ko na kab'ara au bure B'a a bati au bure.

¹² A na reireiaki iroun te UEA akana ongeaba i rouna, Te kawai ae a riai n toua.

¹³ A na bati ni kakab'aiaki, ao a na abana te aba aia kariki.

¹⁴ Te UEA bon raoraoia akana ongeaba i Rouna, Ao E karaoa ana boraraoi ma ngaiia.

¹⁵ I mwiokoa te UEA b'a Ngaia buokau n taai nako; Ao Ngaia ae na kamaiuai man te kanganga.

¹⁶ Te UEA, tani mai nako iu, ao nanoangaai, B'a I maroaa ao I kananoanga.

¹⁷ Kabebeteai man raraomau, ao kamaiuai mani kainanou.

¹⁸ Ko na mutiakin rawaawatau ma marakiu; ao kab'arai au bure ni kabane.

¹⁹ Noriia aiau, ai batiraa! Ao ai batiraa ribakiu irouia.

²⁰ Kamanoai ao kamaiuai. Kawakinai b'a N na aki konaaki, ngkai nneu ni kamaiu Ngkoe.

²¹ I ongotaeka iroum ma nanou ni koaua, Ao I onimakiniko, n ataakina b'a Ko na kamaiuai.

²² Te Atua, kamaiua am Botannaomata ae Iteraera man rawawatana ni kabane.