Taian Areru 22 - Te B'aib'ara

Te Karawawataki ao te Nebonebo

(Ana Areru Tawita; ana b'ai Mataniwiia taan anene, n te b'ana ae Te Ria n te Airoo)

¹ Atuau, Atuau, Ko aera ngkai Ko kitanai? I tang ni korakai ni kainanoa buokau, ma akea ae roko.

² Atuau, I weteiko ni ngaina ao ni bong, ma Ko aki kaekaai; ma ngaia ae I aki kona n rau.

³ Ma te Atua ae Ko tabu Ngkoe, ae ko tekateka i aon am kaintokanuea b'a te Uea ae Ko kamoamoaaki irouia Iteraera.

⁴ A onimakiniko ara bakatibu; A onimakiniko, ao Ko kamaiuia.

⁵ A tang nakoim, ao Ko kamaiuia; A onimakiniko, ao a aki mamaa iai.

⁶ Ma tiaki te aomata ngai, b'a bon te m'ata, ae e kakeaki bonganana ma n riribaaki irouia aomata nako.

⁷ A bane ni b'ainingareai akana norai: A kaenaenaai ni wiia, ao a katoutou atuia;

⁸ Ao a kaangai, Ko onimakina te UEA, Ao ke E kamaiuko! Ngkana E tangiriko, ao ke E buokiko!

⁹ Boni Ngkoe are Ko kaotinakoai man te biroto; Ko tob'atob'aai ngke te merimeri ngai.

¹⁰ E tiku taekau iroum man te tai are I bungiaki iai; ao ai kaman Atuau Ngkoe.

¹¹ Tai kararoako mairou! B'a e a kaan karawawataau, ao akea temanna ae na buokai.

¹² A otab'aniniai kairiribai b'a kanga ai aroia kaaom'aane aika bati, kanga kaao-m'aane aika korakora mai Batian aika korakora.

¹³ A kaure wiia nako iu kanga ai aroia raian aika raraebiti ma ni bekorara.

¹⁴ Akea korakorau, e a nako b'a kanga ai aron te ran ae kab'aroaki. Ao a bane riu n tibanako man tomaia; ao nanou ai aron te nenea ae riki n ran.

¹⁵ E bane korakorau kanga ai aron aontano ae m'auteretere; ao e nimta ngangarakeu neweu, Ao ko kaweneai n te ruanimate.

¹⁶ A otab'aniniai te bootaki n aomata ae buakaka b'a kanga ai aroia kamea; a ewari baiu ma waeu.

¹⁷ A bane n tangaina riu A tarataraai taan ribaai ma te mata ni mimi.

¹⁸ A tib'atib'ai kunnikaiu i marenaia n te aro ni kaiwa.

¹⁹ Te UEA, tai kararoako! Ngkoe ae korakorau, bareiko ni buokai!

²⁰ Kamaiuai man te kabaang; Kamaiuai mairouia kamea aikai.

²¹ Kamaiuai mairouia raian aikai; Akea te bae I kona ni kaitaraia iai kaao-m'aane aika tiritiri aikai.

²² N na tuangiia au botannaomata baika Ko a tia ni karaoi; N na anenea kamoamoaam n aia tai ni bootaki n taromauri.

²³ Kam na kamoamoaa, ngkami aika kam toro iroun te UEA; Kam na karinea, ngkami aika ana kariki Iakob'a; Ao kam na bane ni maaku i rouna, ngkami aika Iteraera.

²⁴ E aki ribaia ke ni kaaki taekaia akana kananoanga n aia tai n rawaawata; E aki tan nako mai rouia, ma E ongo irouia ngkana a tangira buokaia mai Rouna.

²⁵ N tain te bootaki ae ab'ab'aki, ao N na neboiko i bukini baike Ko a tia ni karaoi. N na anga i mataia aomata aika taromauriko karea ake I a tia n taku b'a N anga;

²⁶ A na am'arake ni katoki nanoia akana akea aia b'ai; Ao a na kamoamoa te UEA akana kawaria. A bia anganaki kukurein nanoia n aki toki.

²⁷ A na bane botannaomata nako i aonnaba n ururinga te UEA; A na bane botannaomata n rairaki nakoina n taromauria.

²⁸ Bon te king te UEA, ao E tautaeka i aoia botannaomata.

²⁹ Ane a na bane akana marika i aonnaba n am'am'arake ma n taromauri; ane a na bane ni bobaraaki i matana akana nangi mate, akana i aoni kawaia nakon te ruanimate.

³⁰ Ane a na toro i rouna rooro aika na roko; Ane a tataekina te UEA aomata nakon te roro ae nangi roko.

³¹ Ane a na tuangaki aomata akana tuai bungiaki taekan ana kamaiu te UEA, “B'a E a tia ni karaoia.”