Taian Areru 20 - Te B'aib'ara

Te Tataro i bukin te Tokanikai

(Te areru mairoun Tawita i bukin te tia kaira te katangitang.)

¹ E na buokiko te UEA ngkana ko reke n te kaangaanga! E na kamanoko Atuan Iakob'a!

² E na karekea buokam man ana Tembora, ao ni kateimatoako man te Maunga are Tion.

³ E na butim'aai am karea ni kabane, ao ni kukurei n am karea ni kabane.

⁴ E na anganiko baika a mamate nanom iai ao ni kakoroi bukin am babaire nako.

⁵ Ao ti na takaakaa ni kim'areirei i bukin am tokanikai; ao ti na kamoamoaa te Atua ni katioan am maniua n tokanikai. E na kaekai am bubuti ni kabane te UEA.

⁶ I a ataia ngkai b'a te UEA e na bon anga te tokanikai nakoia ana king ake E a tia n rineia; E na kaekaa man ana karawa are Tabu, ao E na buokiia ni kakatokanikaia ni m'aakana.

⁷ Tem'angina a onimakin aia kaanibuaka, ao tem'angina aia aoti, ma ngaira, ti onimakina m'aakan te UEA ae Atuara.

⁸ Ane a na konaaki aomata akana a onimakin aia kaanibuaka ma aia aoti, ma ti na tokanikai ngaira.

⁹ Te Atua, anga te tokanikai nakon te king; ao ongo iroura ngkana ti weewete.