Taian Areru 148 - Te B'aib'ara

Te Anene Ni Kamoamoa Te Atua

¹ Kam na kamoamoa te UEA! Kam na kamoamoa mai karawa, ngkami akana kam mena n ae rietaata i eta.

² Kam na kamoamoaa, ngkami akana ana anera ni kabaneingkami, akana ana taanga ni buaka i karawa.

³ Taai ma nam'akaina, kam na kamoamoaa; Itoi akana raneanea ootami, kam na kamoamoaa.

⁴ Ngkami karawa akana kabanea n ririeta, kam na kamoamoaa, Ao ngkami naba raan akana i etani karawa.

⁵ A na bane ni kamoamoa aran te UEA! B'a E karikiia n ana taeka;

⁶ Ao E kakia ni neia b'a a na tiku iai n aki tootoki, ao a aki kona n rawa iai.

⁷ Kam na kamoamoa te UEA mai aonnaba, ngkami baika maiu aika kakamaaku i marawa ma ngkami aika marawa aika nano;

⁸ Ma iti ma maibiibi n aiti; ma tinoo ma taian nang ma te ang ae baibati a ongeaba nakon ana taeka.

⁹ Kam na kamoamoa ngkami taian tabuki ma maunga ma kaai aika uaa ma kaai n te buakonikai;

¹⁰ Ma maan ni kabaneia aika manana ma aika katam'anti, ma maan aika kawakawa ma aika kibakiba.

¹¹ Kam na kamoamoa, ngkami uea ma botannaomata ni kabaneia, ma nati n uea ma taan tautaeka ni kabaneia;

¹² Ma ateiaine ma rorobuaka, ma unim'aane ma ataei.

¹³ A na bane ni kamoamoa aran te UEA! E kakannato arana i aon aara nako; E m'aaka i aonnaba ma karawa.

¹⁴ E kakorakoraa ana botannaomata, b'a E aonga ni kamoamoaki irouia ana aomata ni kabaneia ae te botannaomata ae Iteraera, ae kakawaki i rouna. Kam na kamoamoa te UEA!