Taian Areru 147 - Te B'aib'ara

Te Nebo Nakon Te Atua Ae M'aaka

¹ Kam na kamoamoa te UEA! E raoiroi te anene ni kamoamoa Atuara; e kakukurei ao e riai kamoamoana.

² E a kaokaki Ierutarem nakon arona are rimoa iroun te UEA; E a kaokiia ake a tia n riki b'a taenikai.

³ E kamaiuia akana uruaki nanoia, ao E kabae ikoakiia.

⁴ E a tia ni bairei m'aitin taian itoi, ao E karekei araia n tatabeua nako.

⁵ E kakannato ara Uea ao E korakora; akea tokin ana atatai.

⁶ E buokiia ni kamarurungia akana b'ainikirinaki te UEA, Ao E katoki eeia ni kab'ainrangiia akana buakaka.

⁷ Kam na anene ni katituaraoa te UEA; katang ami b'ai ni katangitang nakon Atuara;

⁸ E kaona karawa n taian nang; E katauraoa te karau i bukin aon te aba ao E karikirakei uteute i aoni maunga.

⁹ E angania maan kanaia ao E kaam'arakeia buniia kunei ngkana a tangi ni baki.

¹⁰ E aki anaaki nanon te UEA n taraani korakoraia aoti, ke n taraaia tautia aika ninikoria;

¹¹ Ma E anaaki nanona irouia akana karinea, akana onimakina ana Tangira ae Teimatoa.

¹² Ierutarem, ko na kamoamoa te UEA! Tion, ko na kamoamoa Atuam!

¹³ B'a E kamatoai mataroan nonom, ao E kakab'aiaia aomata akana maeka iroum.

¹⁴ E kawakin tiam b'a a na aki anaaki, ao E kanuaiko n te am'arake ae moan te raoiroi.

¹⁵ E tua ana taeka nako aonnaba, ao baike e taekin a bane ni kakoroaki bukiia ni waekoa.

¹⁶ E kabutaa aon te aba n te tinoo b'a ai aron te burangketi ae taakinaki, Ao E kamaaea te ran ae buraoki b'a ai aron te bubu n tano.

¹⁷ E kamrarai maibi n aiti b'a ai aron atibu aika uarereke; Ai antai ae kona moan te m'aitorotoro aio?

¹⁸ E kanakoa ana taeka, ao e riki n ran te aiti; E kawaia te ang, ao e raanga nako te ran.

¹⁹ E anga ana taeka ma ana tua ma ana moti nakoia Iteraera.

²⁰ Akea riki te botannaomata teuana ae E a tia ni karaoa aio nakoina; A aki atai ana tua. Kam na kamoamoa te UEA!