Taian Areru 144 - Te B'aib'ara

Te Tataro I Bukin Te Buobuoki

(Ana Areru Tawita)

¹ E na neboaki te UEA, ae te tia kamanoai! E kataneiaai i bukin te bo ni buaka ao ni katauraoai nakon te un.

² Boni Ngaia te tia kamanoai ao otangau, nneu ni katantan ao te tia kamaiuai, ae I onimakinna b'a I raba raoi i rouna. E kakiia botannaomata i aani m'akau.

³ Te UEA, tera te aomata ngkai Ko katabeko i rouna ao Ko mutiakinna, ngkai ti te aomata ngaia?

⁴ Ai aron te ike ae ti te ikena ngaia; Ao ana bong ai aron te nu ae roko n nako.

⁵ Te UEA, Ko na raeua karawa ni kaukia ao ruo; Ko na riingi maunga, ao a na tii nako taiani bubu mai iai.

⁶ Kanakoa te iti ao kamaaeia nako akana ribaiko; Katebe kanoan am kainikatebe ao a kabirinakoia.

⁷ Arora baim mai eta, katikai rake man te ran n te tabo ae nano, ao kamaiuai; Kamaiuai mai nanoni baiia aomata aika Ianena,

⁸ Akana aki kona n taekina te koaua e ngae ngkana a taku b'a a berita b'a a taekina te koaua.

⁹ Te Atua, N na anenea te anene ae boou nakoim; N na katanga au b'ai ni katangitang ao N na anene nakoim.

¹⁰ Ko anganiia uea aia tokanikai ao Ko kamaiua Tawita are am toro.

¹¹ Ko na kamaiuai mairouia aomata aika buakaka, akana aki kona n taekina te koaua ma a taekina te kewe, e ngae ngkana a taku b'a a berita b'a a taekina te koaua.

¹² A bia rikirake natira m'aane b'a ai aron aroka aika rikirake ni korakora; Ao natira aine b'a ai aroni boua aika atiibu aika tamaroa taraaia, aika bouan maninganingan ana auti te uea.

¹³ A bia onrake ara ookai n uaanikai n aekaia nako. A bia bungiia natiia aika ngaa ma ngaa ara tiibu aika mena i aon abara.

¹⁴ A bia bungiia natiia ara kao n akea temanna irouia natiia ae na kabuanib'ai. A bia akea te b'ana ni kananokawaki i nanoni kawai n ara kaawa.

¹⁵ E a kab'aia te botannaomata ae a noraki baikai ni maiuna b'a a koaua; E a kab'aia te botannaomata ae Atuana te UEA.