Taian Areru 143 - Te B'aib'ara

Te Tataro i bukin Ana Buobuoki te UEA

(Ana areru Tawita)

¹ Te UEA, Ko na ongo au tataro! Te Atua ae Ko raoiroi ma ni kakaonimaki, Ko na ongora n au bubuti!

² Tai motika taekan am toro ni kabuakaka; b'a akea te aomata ae maiu ae e raoiroi i matam.

³ E kaeai te tia ribaai, ao I rawata ni b'ainikirinaki i rouna. E katukai n te tabo ae roo, ao I riki n ai aroia ake a kamani mate.

⁴ Ma ngaia ae e mamara nanou, ao ai akea te bae I kona ni karaoia.

⁵ I uringi boong aika nako; I iaiangoi am m'akuri ma b'aai ni kabane ake Ko karaoi, ao i kaaki n au iango am m'akuri ni kabane.

⁶ I tabeki rake baiu n tataro nakoim; e kai nanou n tangiram, kanga ai aron te tano ae m'auteretere ni kainanoa te ran.

⁷ Te UEA, Ko na ongo ngkai irou! Akea au kaantaninga. Tai karabako mairou, b'a I kaawa n riki b'a temanna i buakoia ake a tia ni mate.

⁸ Ko na kaururingai ni katoa ingaabong n taekan am Tangira ae Teimatoa, B'a I onimakiniko. I tataro nakoim; kaota te kawai ae N na toua.

⁹ Te UEA, N na kamanoai iroum; Ko na kamaiuai mairouia aiau.

¹⁰ Bon Atuau Ngkoe; reireiai karaoan nanom. E na kairiirai Tamneim ae e raoiroi n te kawai ae aoraoi.

¹¹ Te UEA, Ko na kamaiuai, n ai aron am Taeka. Te Atua ae Ko raoiroi, Ko na buokai n rawaawatau!

¹² Ngkai Ko tangirai, ao tiringiia aiau ma akana b'ainikirinai ni kabaneia; B'a am toro ngai.