Taian Areru 142 - Te B'aib'ara

Te Tataro i bukin Ana Buobuoki te UEA

¹ I wetea te UEA b'a E na buokai; I bubutiia.

² I taekin nakoina baika I aki rau iai; I tuangnga au kaangaanga ni kabane.

³ Ngke e nangi b'ara nanou, ao boni Ngaia ae ataa arou. A tia taan ribaai ni karaba te b'ai ni kam'am'ane i m'aiu i nanon te kawai ae I nakonako iai.

⁴ Ngke I tara rarikiu, ao I noria b'a akea ae na buokai, akea ae na kamanoai. Akea ae tabeakina maiu.

⁵ Te UEA, I weteiko b'a Ko na buokai; te UEA, boni Ngkoe ae te tia kamanoai, Akea ae I kainanoia b'a ti Ngkoe n te maiu aei.

⁶ Ko na ongo b'anaau ni kani buokaki, b'a e korakora kainanou; Kamaiuai mairouia taan ribaai; a rangi ni korakora riki nako iu.

⁷ Kamaiuai man rawaawatau; ao N na neboiko n aia tai ni bootaki am aomata i bukin am akoi nako iu.