Taian Areru 141 - Te B'aib'ara

Tataron te Tairiki

(Ana Areru Tawita)

¹ Te UEA, I weteiko; Ko na buokai ngkai! Ko na ongora irou ngkana I weteiko.

² Butim'aea au tataro b'a kanga te karea ae boiarara, ao baiu aika tabekaki rake b'a kanga te karea n te tairiki.

³ Te UEA, Ko na taua aroni wiiu ke riau, ngkana I taekina te b'ai teuana.

⁴ Ko na tukai mani kani karaoan ae buakaka, ao man raonakiia akana buakaka ni karaoi m'akuri aika bubuaka. N na aki am'arake ma ngaiia n aia tai ni bootaki.

⁵ E kona n oreai te aomata ae e raoiroi ma ni boaai i bukin nanona ni kan akoi, Ma I bon aki kona ni kariaia karineau mairouia akana buakaka, i bukina b'a I aki toki n tatataro b'a a na ekakinako aia m'akuri aika bubuaka.

⁶ Ngkana a teweaki nako aia tia motiki-taeka mani b'a aika ririeta, Ao a na kakoaua iai aomata b'a a eti au taeka.

⁷ Aron te kai ngkana e bwenauaki ao e korokoreaki ni kauarerekeaki, Ao ai aron naba taraan riia ni wene n uamaae ri mataniwin te ruanimate.

⁸ Ma I teimatoa n onimakiniko, te UEA ae au Uea. Boni nneu ni katanai Ngkoe; Tai katukai b'a N na mate!

⁹ Ko na kawakinai b'a N na aki m'ane n aia b'ai ni kam'am'ane akana buakaka, akana a katauraoi ni karabai i m'aiu.

¹⁰ Ke a m'ane n oin aia b'ai ni kam'am'ane, ma N na aki m'ane iai ngkana I rikekei.