Taian Areru 128 - Te B'aib'ara

A Bane Ni Kab'aia Akana Maka te UEA

(Te Anene N Ararake)

¹ A kab'aia akana karinea te UEA, akana karaoa nanona ni maiuia.

² Ane ko na kana uaani mwin am M'akuri; ko na kukurei ma n tetekeraoi.

³ E na riki buum i nanoni mwengam b'a te aine ae kakariki kanga ai aron te kureebe ae kakariki uaa; ao natimi kanga ai aroia aroka aika oriwa aika tib'a tabe n rikirake, ngkana a otab'aninia am Taibora.

⁴ E na boni kakab'aiaki n te aro aei te aomata ae karinea te UEA.

⁵ E na kakab'aiako te UEA mai Tion! Ao ko na nora tetekeraoin Ierutarem n ua tokini bongini maium!

⁶ E na teimatoa maium b'a ko aonga n noriia tibum! E na mena te rau i aoia Iteraera!