Taian Areru 122 - Te B'aib'ara

Kamoamoaan Ierutarem

(Te Anene N Ararake iroun Tawita)

¹ I kukurei ngke a kaangai nako iu, Ti a nako n te Tembora are ana auti te UEA.

² Ae ti a roko iai, ao ti a tei ngkai i nanon oon Ierutarem!

³ Ierutarem bon te kaawa ae kateaki, b'a neia aomata ni bobotaki.

⁴ A roko iai baronga nako, ake ana baronga te UEA, B'a a na katituaraoa iai te UEA, n ai aron ana taeka nakoia Iteraera.

⁵ Ana kaintokanuea Tawita e mena ikai ike tautaeka iai te motikitaeka ae eti.

⁶ Ierutarem, ti na tataro b'a ko aonga n rau: ao a na bane n tekeraoi akana tangiriko.

⁷ E bia teimatoa te rau i nanon oon am kaawa ni kabaneia ao i nanon am bareti nako.

⁸ I bukiia au koraki ma raoraou, ao N na tataro b'a e na reke te rau iroumi.

⁹ I bukin ana auti te UEA ae Atuara, ao N na bon m'akuri i bukimi b'a kam na tekeraoi.