Taian Areru 119 - Te B'aib'ara

Ana Tua te Atua

¹ A kab'aia akana a moa n raoiroi aroia, akana ongeaba nakon ana Tua te UEA.

² A kab'aia akana kawakin ana taeka, akana ukoukoria n nanoia ni kabane;

³ Akana aki karaoi m'akuri aika buakaka, ma a karaoa nanona.

⁴ Ko tuangiira am Taeka b'a ti na botum'aka n tauu.

⁵ Bon au kaantaninga b'a N na kakaonimaki n tauu am Tua!

⁶ Iaiangoan am Tua irou bon tukau mani karaoan te b'ai ae N na kamaamaaeaki iai.

⁷ Ngkai I reirei am Moti aika raraoi, ao N na katituaraoiko ma nanou ni koaua.

⁸ N na ongeaba nakon am Tua; tai kitanai naba teutana!

Te Ongeaba Nakon Ana Tua te UEA

⁹ E kanga n reke te maiu ae itiaki iroun te aomata ae e a ikawai? Tii ngkana e ongeaba nakon am Taeka.

¹⁰ I kekeiaki n toro iroum ma nanou ni koaua; Kawakinai man riaoan am Tua.

¹¹ I kaaki am Taeka i nanou, b'a I aonga n aki bure nakoim.

¹² Te UEA, I neboiko; reireiai am Tua.

¹³ N na karakin am Tua ake Ko a tia n taekin.

¹⁴ I a kukurei riki n iri nanon am Taeka nakon tangiran te kaub'ai ae bati.

¹⁵ N na kamateb'aia am Tua, ao N na nenera am Taeka.

¹⁶ I kukurei n am Tua; N na aki m'anuoka am Taeka.

Te Kukurei n ana Tua te Atua

¹⁷ Ko na akoai, ngai ae am Toro, b'a I aonga ni maiu, ao N na taua am Taeka.

¹⁸ Kaure matau, b'a I aonga n taratarai koaua aika kamimii akana i nanon am Tua.

¹⁹ Tiaki te tia tiku ni maan ngai i aon te aba; Tai tukai man atan am Tua.

²⁰ E rangi ni kainano nanou n tangira am Tua n taai nako.

²¹ Ko boaiia akana kainikatonga, a na reke kaiia, akana aki ongeaba nakon am Tua.

²² Kawakinai man aroia n iowawa ao n riribai, i bukina ngkai I kawakin am Tua.

²³ A kabowi taan tautaeka n iangoa bukinau, ma N na bon teimatoa n iaiangoi am Taeka n reirei.

²⁴ A kakukureiai am Taeka n reirei, ao a anganai naba taeka ni buobuoki.

Te Nano Ni Kan Ongeaba Nakon Ana Tua te UEA

²⁵ I a kani mate: kamaiuai, n ai aron am Taeka.

²⁶ Ngke I kaoti nakoim au kaangaanga, ao Ko kaekai au tataro; Reireiai am Tua.

²⁷ Buokai b'a N na oota n am Tua, ao N na iaiangoi am Taeka n reirei aika kamimii.

²⁸ I taonaki n te nanokawaki ae moan te bati: Ko na kakorakoraai, n ai aron am Taeka.

²⁹ Kawakinai mani b'ainan te maiu ni kewe, Ao nanoangaai n reireiai am Tua.

³⁰ I a tia ni kataua b'a N na ongeaba; N na aki m'anuoki am Tua.

³¹ I iri nanon am Taeka, te UEA, buokai b'a N na aki mamaa iai.

³² N na kakorakoraai n tou mwin am Tua, Buokai ni karabaaba riki ootan nanou.

Te Tataro I Bukin Te Kan Oota

³³ Te UEA, reireiai nanon am Tua, ao N na iri nanoia n taai nako.

³⁴ Anganai te kona n ota n nanon am Tua, B'a I aonga n ongeaba nako iai, ao ni kawakinna ma nanou ni koaua.

³⁵ Kateimatoa ongeabau nakon am Tua, b'a I kukurei iai.

³⁶ Angan nanou te kan ongeaba nakon am Tua, Ma tiaki te mataai ni kanib'aib'ai.

³⁷ Kawakinai man iaiangoani baika akea bonganaia, Ao anganai te maiu n iran nanom.

³⁸ Kakoroa bukin am Taeka are Ko a tia ni kab'aka nako iu, ngai ae am Toro are am Taeka i bukiia ake a karineko.

³⁹ Kamaiuai man taetae n iowawa aika I rangi n ribaai; Ai kamimiira am Moti!

⁴⁰ I kan ongeaba nakon am Tua; anganai te maiu ae boou, B'a te aomata n raoiroi Ngkoe.

Onimakinan Ana Tua te UEA

⁴¹ Te UEA, kaota nako iu m'aitin tangirau iroum, Ao kamaiuai, n ai aron am Taeka.

⁴² Ao I a kona ngkanne ni kaekaia akana iowawa nako iu, B'a I onimakina am Taeka.

⁴³ Anganai te kona n taekina te koaua n taai nako: B'a I onimakina arom ni babaire.

⁴⁴ N na ongeaba nakon am Tua n taai nako ao n aki tootoki.

⁴⁵ N na maiu n inaomata, ngkai I kekeiaki n ongeaba nakon am Tua.

⁴⁶ N na tataekin am Taeka nakoia uea, Ao N na aki mamaa iai.

⁴⁷ I kakukureiaki n am Tua i bukina ngkai I tangiri.

⁴⁸ I karinei ma n tangiri am Tua, N na iaiangoi.

A Onimakinaki Ana Tua te UEA

⁴⁹ Uringa te baere Ko a tia n taku nako iu, ngai ae am Toro, b'a Ko na karaoia; ngaia ae I mwiokoia.

⁵⁰ E bebete nanou n au tai n rawaawata, B'a e anganai te maiu am Taeka.

⁵¹ A aki toki ni kaenaenaai akana kainikatonga, Ma I kakaonimaki n iri nanon am Tua.

⁵² Te UEA, ngke I uring am Moti ake ngkoangkoa, Ao a karekea raun nanou.

⁵³ I rangi n un irouia aomata aika buakaka aika urua am Tua.

⁵⁴ A riki b'a m'aneweni kunau taekan am Tua n au tai ni maiu ae kimototo i aon te aba.

⁵⁵ Te UEA, I uringko ni bong, ao I ongeaba nakon am Tua.

⁵⁶ E reke kukureiu n touani mwin am Tua.

Te Kakaonimaki Nakon Ana Tua te UEA

⁵⁷ Te UEA, akea ae I tangiria b'a ti Ngkoe, N na ongeaba nakoim.

⁵⁸ I butiko ma nanou ni koaua, b'a Ko na nanoangaai, n ai aron am Taeka.

⁵⁹ I iangoi aroarou, ao I a manga rairaki n tou mwin am Taeka.

⁶⁰ I kawaetataai, ao I aki iremwe, n tou mwin am Tua.

⁶¹ A kataia ni kani kam'aneai akana buakaka, Ma I aki m'anuoka am Tua.

⁶² N na teirake n te nukanibong ni katituaraoiko i bukin am Moti aika raraoi.

⁶³ Bon raoia akana karineko ngai, ma akana ongeaba nakon am Tua.

⁶⁴ Te UEA, a on aonnaba n am Atataiaomata; Reireiai am Tua.

Kakawakin Ana Tua te UEA

⁶⁵ Te UEA, Ko kakaraoa ae e raoiroi nako iu, ngai ae am Toro, n ai aron am Taeka.

⁶⁶ Reireiai b'a N na wanawana ao N na rabakau, B'a I kakoauai am Tua.

⁶⁷ I m'ain are Ko karawawataai, ao I aki toki ni bure; Ma ngkai I ongeaba nakon am Tua.

⁶⁸ Ai raoiroira Ngkoe—Ko a akoi ra! reireiai am Tua.

⁶⁹ A taekinai n te aro ni kewe akana kainikatonga, Ma I ongeaba nakon am Tua ma nanou ni koaua.

⁷⁰ Akea aia atatai aomata aikai, ma I kakukureiaki n am Tua.

⁷¹ E manena nako iu karawawataau, b'a I reireiaki iai n am Tua.

⁷² E manena riki nako iu am Tua are Ko anga, nakoni manenan te kaub'ai ae bati i aonnaba.

Te Kaetitaeka Ae Raoiroi N Ana Tua te UEA

⁷³ Ko karikai, ao Ko kawakinai raoi; kawanawanaai b'a I aonga n reireiai am Tua.

⁷⁴ A na kukurei akana karineko ngkana a norai, i bukina b'a I onimakina am Taeka.

⁷⁵ Te UEA, a eti am Moti; ao Ko aki kairua ngke Ko karawawataai.

⁷⁶ E na kabebeteai am Atataiaomata, n ai aron am Taeka nako iu, ngai ae am Toro.

⁷⁷ Nanoangaai, ao N na maiu: b'a bon au b'ai ni kukurei am Tua.

⁷⁸ Ke a mamaa akana kainikatonga, i bukina ngkai a bukinai n te aro ni kewe; Ma ngai, N na iaiangoi am Tua.

⁷⁹ Ke a kawarai akana karineko, b'a a aonga n reireiaki n am Taeka.

⁸⁰ E bia moan te kororaoi ongeabau nakon am Tua, B'a I aonga n aki mamaa.

Te Tataro I Bukin Te Kamaiuaki

⁸¹ I a kua n tataningaiko b'a Ko na kamaiuai; I mwiokoa am Taeka.

⁸² A kua matau n taratara i bukini kan noran te baere Ko taku; Ma ngaia are I a titiraki, Ko na buokai n ningai?

⁸³ I a riki b'a kanga ai aroni nen te wain ae e a mangaingai ae akea bonganana; Ma I bon aki m'anuoki am Tua.

⁸⁴ Ai ti maanraa ngai, ae am toro n tataninga? Ko na kareke kaiia akana b'ainikirinai n ningai?

⁸⁵ A keni kinono b'a a na kam'aneai iai akana kainikatonga, akana aki ongeaba nakon am Tua.

⁸⁶ A bane n onimakinaki am Tua, I b'ainikirinaki irouia taani kewe, buokai!

⁸⁷ I kuri kanga ni mate irouia, ma I aki kaaki taekan am Tua.

⁸⁸ Kamaiuai n am Tangira ae akea tokina, b'a I aonga n ongeaba nakon am Tua.

Te Onimaki N Ana Tua te UEA

⁸⁹ Te UEA, e na teimatoa koauan am Taeka n aki toki; e na teimatoa n aki toki i karawa.

⁹⁰ E teimatoa am Kakaonimaki nakon rooro ni bane; Ko a tia ni kataua te aonnaba ma nena, ao e nene ni matoatoa iai.

⁹¹ A tiku b'aai n aroia ni karokoa te bong aei i bukin am Taeka; B'a a bane b'aai ni m'akuri i bukim.

⁹² Ngke arona b'a e aki nako mwini kukureiu man am Tua, Ao N na kaman tia ni mate i buakon rawaawatau.

⁹³ N na bon aki m'am'anuoki am Taeka, b'a Ko anganai maiu iai.

⁹⁴ Bon am B'ai ngai-kamaiuai! b'a I a tia ni kekeiaki n ongeaba nakon am Taeka.

⁹⁵ A karanai akana buakaka b'a a na kamateai, Ma N na iaiangoi am Taeka.

⁹⁶ I a tia ni kakoaua b'a iai tokini b'aai nako; Ma akea tokin am Tua.

Tangiran Ana Tua te UEA

⁹⁷ Ai batiraa tangiran am Tua irou! Au b'ai n iaiangoia n te bong koraki.

⁹⁸ A kawanawanaai riki am Tua nakoia taan ribaai: b'a a memena irou n taai nako.

⁹⁹ I rabakau riki nakoia au tia reirei ni kabaneia, i bukin ae I iaiangoi am Taeka.

¹⁰⁰ I atatai riki nakoia unim'aane, i bukina ngkai I ongeaba nakon am Taeka.

¹⁰¹ I aki karaoi m'akuri aika buakaka ni kabane, ngkai I kan ongeaba nakon am Taeka.

¹⁰² I a tia n ongeaba nakon am Taeka n reirei, Ngkai bon au Tia Reirei Ngkoe.

¹⁰³ A karewerewe riki am Taeka aia karewe manibeeru!

¹⁰⁴ E reke irou te wanawana n am Taeka, Ma ngaia ae I ribaai aroaro aika buakaka ni kabane.

Te Ota man ana Tua te UEA

¹⁰⁵ E riki am Taeka b'a kanga te taura ni kaota kawaiu n nakonako.

¹⁰⁶ I a tia ni kab'aka au taeka, ao N na kakoaua b'a N na tou mwin am Babaire aika raraoi.

¹⁰⁷ I bati ni karawaawataaki: te UEA, kamaiuai n ai aron am Taeka.

¹⁰⁸ Te UEA, butim'aea au karea ae b'anaau ni katituaraoiko, Ao reireiai am Tua.

¹⁰⁹ I tauraoi n taai nako ni bo ma kaangaanga ni maiu, Ma I aki m'anuoka am Tua.

¹¹⁰ A kataia ni kam'aneai akana buakaka n aia b'ai ni kam'am'ane, Ma I a bon aki kitan am Taeka.

¹¹¹ A riki am Taeka b'a au b'ai n aki toki; A kakukureia nanou.

¹¹² I a tia ni motika nanou b'a N na ongeaba nakon am Tua ni karokoa mateu.

Reken Te Rau N Ana Tua te UEA

¹¹³ I ribaia akana aki bane nanoia ni kakaonimaki nakoim; ma I tangira am Tua.

¹¹⁴ Bon te tia kamanoai Ngkoe ao otangau; E wene au kaantaninga n am Taeka.

¹¹⁵ Naako mairou, ngkami akana kam kakaraoa ae buakaka: I a kataua te ira nanon ana tua Atuau.

¹¹⁶ Anganai korakorau n ai aron am taeka, b'a I aonga ni maiu; Tai kab'ara nanou man au kaantaninga!

¹¹⁷ Kawakinai raoi man te kabuanib'ai, ao N na mutiakin am Tua n aki toki.

¹¹⁸ Ko ribaia akana kitan am Tua; ao a aki bongana aia iango akana m'am'anaa te aba.

¹¹⁹ Arom nakoia akana buakaka ni kabaneia kanga maange iroum; Ma ngaia ae I tangiri am Taeka n reirei.

¹²⁰ I ruru b'a I makuko: I maaku n am Moti.

Te Ongeaba nakon ana Tua te UEA

¹²¹ I a tia ni karaoa ae eti ao ae e raoiroi; tai katukai nakoia akana karawawataai.

¹²² Buokai ao kamanoai, ngai ae am toro; A na tai karawawataai akana kainikatonga.

¹²³ A kai matau ni kan nora kakoroan nanon am Taeka i bukin rokon am Kamaiu.

¹²⁴ Kaota am Tangira i buku, ngai ae am Toro; Ao reireiai am Tua.

¹²⁵ Bon am Toro ngai, kawanawanaai: b'a I aonga n atai nanon am Taeka.

¹²⁶ Karaoa ae ko taku, te UEA! B'a a urua am Tua aomata.

¹²⁷ I tangiri riki am Tua nakon te koora, ae te koora ae moan te raoiroi.

¹²⁸ Ma ngaia ae I tou mwin am Taeka ni kabane, Ao I ribaai aaro ni kabane akana kairua.

Te Nano Ni Kan Ongeaba Nakon Ana Tua te UEA

¹²⁹ A kamimii am Taeka; I ongeaba nako iai ma nanou ni koaua.

¹³⁰ E karekea ootan nanoia akana bangab'ai am Taeka, Ao e kawanawanaia naba.

¹³¹ E rangi ni korakora kainanoan am Tua irou.

¹³² Tani mai, ao nanoangaai, n ai aroarom nakoia akana tangiriko.

¹³³ Kawakinai b'a N na aki b'aka, n ai aron am Taeka; Ao tai katokanikaia te buakaka i aou.

¹³⁴ Ko na kamaiuai mani karawawatakiu irouia aomata; B'a I aonga n ongeaba nakon am Taeka.

¹³⁵ Kakab'aiaai ni menam i rarikiu, ao reireiai am Tua.

¹³⁶ A waanako rannimatau kanga ai aron raangan ranin te karaanga, B'a a aki ongeaba aomata nakon am Tua.

E Aki Nanonano Ana Tua te UEA

¹³⁷ Te UEA, Ko raoiroi, ao a eti am Babaire.

¹³⁸ A koaua ao a onimakinaki am tua ake Ko anga.

¹³⁹ I rangi n un, ngkai a m'anuoki am Taeka aiau.

¹⁴⁰ Te oi ni b'ai ni koaua am Taeka; I tangiria, ngai ae am Toro.

¹⁴¹ I mangori ao I aki kubaraki: ma I aki m'anuoki am Taeka.

¹⁴² E teimatoa am Raoiroi n aki toki; Ao e teimatoa koauan am Tua.

¹⁴³ E ituai te rawaawata ma te maraki, ma I kakukureiaki n am Tua.

¹⁴⁴ A eti n aki toki am Taeka: Buokai b'a N na oota iai, ao N na maiu.

Te Tataro I Bukin Te Kani Kainaomataaki

¹⁴⁵ I weewete ma nanou ni koaua; te UEA, ongo irou, Ao N na ongeaba nakon am Tua.

¹⁴⁶ I weweteiko; kamaiuai, ao N na kawakin am Taeka.

¹⁴⁷ Ngke e tuai n oti taai ao I weewete b'a Ko na buokai: E mena au kaantaninga n am Taeka.

¹⁴⁸ I aki matu n te bong i bukin iaiangoan am Taeka.

¹⁴⁹ Te UEA, ongo b'anaau n ai aron am Atataiaomata; Kamaiuai n am Moti aika eti.

¹⁵⁰ A kaaniai akana kaaea te buakaka; ae aomata aika a raroa man am Tua.

¹⁵¹ Te UEA, Ko kaan nako iu; a onimakinaki am Tua ni kabane.

¹⁵² I atai am Taeka ma ngkoa: b'a Ko karaoi b'a a na teimatoa n aki toki.

Te Bubuti Te Kani Buokaki

¹⁵³ Norai n rawaawatau, ao kamaiuai; b'a I aki m'anuoka am Tua.

¹⁵⁴ Buokai n taetae i buku, ao kainaomataai; Kamaiuai n ai aron am Taeka.

¹⁵⁵ A na aki kamaiuaki akana buakaka, b'a a aki ongeaba nakon am Tua.

¹⁵⁶ Te UEA, e bati am Nanoanga; kamaiuai n am Moti aika eti.

¹⁵⁷ A bati aiau ma akana b'ainikirinai, ma I aki kitan am Taeka.

¹⁵⁸ I noriia taan rawa nakon am Tua, ao I ribaia; B'a a aki taua am Taeka.

¹⁵⁹ Te UEA, nora aron tangiran am Taeka irou! Kawakina maiu n ai aron am Atataiaomata.

¹⁶⁰ A bane ni koaua am Taeka; ao akea tokin am Moti aika raraoi ni kabane.

Te Kakaonimaki Nakon Ana Tua Te Atua

¹⁶¹ A b'ainikirinai uea n akea bukina; Ma ti am Taeka aika I rangi ni makui.

¹⁶² I kim'areirei n am Taeka, n ai aron temanna ae reke i rouna baika rangi ni kakawaki.

¹⁶³ I riba te kewekewe ao I aki kona n taraia; Ma I tangira am Tua.

¹⁶⁴ Itiua kamoamoam irou n te bong ae koraki, i bukin am Moti aika raraoi.

¹⁶⁵ A rau aroia akana tangira am Tua, ao akea te kaangaanga ae a na b'akaraki iai.

¹⁶⁶ Te UEA, I kaantaninga kamaiuakiu iroum; Ao I tou mwin am Tua.

¹⁶⁷ I ongeaba nakon am Taeka, ao I bati n tangiri.

¹⁶⁸ I ongeaba nakon am Tua ma am Taeka: Ko noori aroarou ni bane.

Te Tataro i bukin Ana Buobuoki te UEA

¹⁶⁹ Te UEA, ongo au tataro: Kawanawanaai n ai aron am Taeka.

¹⁷⁰ Ongora n au bubuti; kamaiuai n ai aron am Taeka.

¹⁷¹ N na aki toki ni katituaraoiko, ngkai Ko reireiai am Tua.

¹⁷² N na anene ni kaoti aron am Taeka, b'a a bane n eti am Tua.

¹⁷³ Ko na tauraoi ni buokai, i bukina ngkai I tou mwin am Taeka.

¹⁷⁴ Te UEA, I kainanoa am Kamaiu! I kakukureiaki n am Tua.

¹⁷⁵ Kateimatoa maiu, b'a I aonga ni kamoamoako; Ke a buokai am Taeka n reirei.

¹⁷⁶ I m'aninga nako n ai aron te tiibu ae bua; Ukoukorai, ngai ae am Toro, i bukina ngkai I aki m'anuoki am Tua.