Taian Areru 118 - Te B'aib'ara

Te Tataro Ni Katituaraoi

¹ Kam na katituaraoa te UEA, b'a E raoiroi, ao akea tokin ana tangira.

² Ke a kaangai te botannaomata ae Iteraera, Akea tokin ana tangira.

³ Ke a kaangai ana Ibonga te Atua, Akea tokin ana Tangira.

⁴ Ke a bane ni kaangai akana taromauria, Akea tokin ana tangira.

⁵ I wetea te Atua ngke e kai nanou; E ongo irou ao E kamaiuai.

⁶ Bon raou te UEA, N na aki maaku; Tera ae e kona te aomata ni karaoia nako iu?

⁷ Bon te UEA buokau, ao N na tokanikai i rouna i aoia akana riribaai.

⁸ E raoiroi riki te onimakina te UEA i bukin kawakinara nakon onimakinaia riki tabeman,

⁹ n reitaki naba ma taani kairiri aika korakora.

¹⁰ A otab'aniniai kairiribai aika bati; ma E buokai te UEA n ekianako nako ni m'akana!

¹¹ A otab'aniniai; ma E buokai te UEA n ekianako nako ni m'akana!

¹² A otab'aniniai n ai aroia manibeeru, ma a waekoa n toki eeia ni bane; ngkai E buokai te UEA n ekianako nako ni m'akana.

¹³ E korakora buakanakiu n te aro ae N nang konaaki, Ma E buokai te UEA.

¹⁴ E kakorakoraai te Atua ao E kamarurungai; E a tia ni kamaiuai.

¹⁵ Man aia kaemb'a ni maeka ana aomata te Atua ao e roko te takakaa n tokanikai ni kaotia b'a E reke aei iroun te UEA ni m'akana ae korakora!

¹⁶ Ni m'aakan baina E reke ana tokanikai! E boni m'aaka te UEA.

¹⁷ I tekeraoi b'a I aki mate; ma ngaia ae N na kabongana maiu n tataekina te b'ai ae E a tia ni karaoia te UEA.

¹⁸ E a tia ni karaoa ae N na rangi ni karawaawataaki iai, Ma E aki anga ngai nakon te mate.

¹⁹ Kauka nako iu mataroan te motikitaeka ae eti N na rin man tuanga te UEA; arou n anganna katituaraoana!

²⁰ Aio ana mataroa n rin te UEA; akana kakaraoa ae raoiroi ana boni kona n rin iai.

²¹ Te UEA, I neboiko, i bukina ngkai Ko kaekai au tataro ao ko kamaiuai

²² Te atibu are a kakeaa bonganana taani kateitei, e a riki b'a te kabanea ni kakawaki.

²³ Boni mairoun te UEA te baei; ai kamimiira taraana!

²⁴ Aio bongin ana tokanikai te UEA! ti na kukurei, ao ti na kakatonga n te bong aei

²⁵ Kamaiura, te UEA, kamaiura! Ti na butiia te UEA ma nanora aika itiaki b'a e na anganira te tekeraoi!

²⁶ E na kakab'aiaki iroun te Atua te aomata ae nako mai n aran te UEA! Ti taetae ni kakab'aiaingkami man te Tembora ae ana Auti te UEA.

²⁷ Bon te Atua te UEA; E a tia n anganiira te oota! Moana te bootaki ni kukurei! Kam na m'ananga ma m'angani kaai ao waaki nakon te baonikarea.

²⁸ Bon Atuau Ngkoe, ao N na katituaraoiko; N na kaotiota kakannatom.

²⁹ Kam na katituaraoa te UEA, b'a E raoiroi, E akoi ao akea tokin ana tangira.