Taian Areru 109 - Te B'aib'ara

Ngurenguren Te Aomata N Tain Te Kaangaanga

(Te areru mairoun Tawita i bukin te tia kaira te katangitang.)

¹ Te Atua, I kamoamoako; tai tiku ni kainab'aabu!

² A eekainako akana buakaka ma akana m'am'anaa te aba. A kewe n aia taeka i buku,

³ Ao a taetae ni kaota ribakiu i rouia akea bukin uniia irou.

⁴ A kabuakakaai, e boni ngae ngke I tangiriia ao I tatataro i bukiia.

⁵ I karaoi baika raraoi i bukiia, ma a kaboa nako iu ni baika bubuaka; I tangiriia, ma a ribaai.

⁶ A taku au kairiribai “Rinea te aomata ae moti buaka b'a e na motika taekan aiau n te kabowi,

⁷ E bia reke n te bure ngkana e kabowiaki! e bia atongaki naba ana tataro b'a a bure!

⁸ E bia waekoa n toki maiuna; e bia tauaki ana m'akuri iroun temanna!

⁹ A bia riki natina n aroia ataei aika akea tamaia, ao buuna b'a te aine ae e a tia ni mate buuna!

¹⁰ A bia riki natina n aroia aomata aika aiwaa ni bububuti kanaia; ao ni maeka n auti aika aki tamaroa te tabo ae a urebekebeke autina!

¹¹ A bia anaaki ana b'ai ni kabane iroun ane iai baena i rouna; Ao a bia anaaki uaan ana m'akuri irouia iruwa.

¹² Ai bia akea te aomata ae na ataataiaomata nakoina ke n nanoangaia natina aika tiku i mwina.

¹³ A bia bane ni mate ana kariki, ao e bia aki uringaki taekana n te roro ae na roko.

¹⁴ E bia aki kona te UEA ni m'anuokin taekan aia bure ana bakatibu, ke temanna irouia ana utu

¹⁵ A bia aki kona ni bua taekan aia bure iroun te UEA, B'a E aonga ni kamaunai taekaia mai aon te aba.

¹⁶ Akea iroun te aomata anne iangoani kani karaoan te m'akuri n ataataiaomata: E b'ainikiriniia ma ni kamateia akana akea aia b'ai, ma akana a kai nanoia, ma akana a b'ara nanoia.

¹⁷ “E karereantia te koraki. E bia reke kaina! E rarawa n taetae ni kakab'aiaia aomata. E bon karika te kabuanib'ai i bukin kakab'aiana!

¹⁸ Tii te karereanti rakeana, ae kanga ai aron ononeana ni kunnikaina; A bia rin nako ana karereanti i nanon rab'atana n ai aron te ran ae e moi iai, ao a roro nako n ai aron te b'a nakon riira!

¹⁹ E bia rabunaki n ana karereanti n ai aron ae e rabunaki n te kunnikai, ao n niroaaki nuukana iai b'a kanga ai aron te kabaeana ni katoa bong.

²⁰ Te UEA, kareke kaiia aiau n te aro anne ake te koraki ake a atong taeka aika ribuaka i buku!

²¹ Ma Ngkoe, ae te UEA ae te Uea, buokai ngkai bon anne arom, Ao kamaiuai i bukin raoiroin am Tangira.

²² Akea au b'ai ao e kai nanou; e korakai nanou.

²³ I a kaan mauna nako n ai aron te nu ngkana e a kan tairiki; I ukaki nako n ai aron te keeketi.

²⁴ A mamara bubuani waeu i bukin te aki am'arake; Moan te bakitaia rab'atau.

²⁵ Ngkana a norai au kairiribai, ao a taekin taeka aika buakaka a katoutou atuia ni kaenaena.

²⁶ Te Uea ae Atuau, buokai; Nakomai kamaiuai i bukin n ai aron am Atataiaomata!

²⁷ Kaotia nakoia aiau b'a a aonga n ataia ae Ngkoe ae Ko kamaiuai.

²⁸ Aia b'ai te karereanti, ma am b'ai te kakab'aia. A bia konaaki aoia aiau, ngkana ana ewekai ao ngai ae am Toro, I bia kukurei!

²⁹ A bia taonaki aiau n te b'ainrang ae bati! e bia riki mamaaia b'a kanga ai aron te kunnikai ae a na b'ainiia iai.

³⁰ N na kanenea b'anaau n nebonebo ni katituaraoiko te UEA; n aia tai ni bootaki aomata,

³¹ Ko buokiia aika kai nanoia, ao ko kamaiua mairouia akana motika taekana b'a e na kamateaki.