Taian Areru 107 - Te B'aib'ara

1 BOKI NIMAUA Areru 107—150 E Raoiroi te UEA Nakoia Ana Aomata

¹ Kam na katituaraoa te UEA, b'a E raoiroi; Akea tokin ana ataataiaomata.

² Ke a atonga aei akana kamaiuaki iroun te UEA; Akana E kamaiuia mai nanoni baiia aiaia,

³ Ake E kaokiia man taabo nako: mai mainiku ao mai maeao, mai meaang ao mai maiaki.

⁴ A tiotio nako n te rereua n te kawai ae kamaroaa; E aki reke irouia te kaawa are a na maeka iai.

⁵ A mate ni baki, ao a taka, ao a b'ara nanoia.

⁶ A wetea te UEA, ngke a kai nanoia, ao E kamaiuia man rawawataia.

⁷ E kairiia nako i nanon te kawai ae eti nakon te kaawa are a na maeka iai.

⁸ A riai ni katituaraoa te UEA i bukin ana ataataiaomata, Ao i bukini baike a kamimii ake E a tia ni karaoi i bukiia.

⁹ E katoki takaia akana kani moi, ao E kanuaia akana baki ni baika raraoi ake a kang.

¹⁰ Iai tem'angina ake a kabureaki; a rawaawata b'a a kabaeaki n taurekereke aika biiti, Ao a katukaki n te rotongitong:

¹¹ B'a kioina ngke a rawa nakon ana taeka te Atua are Moan te M'aaka, Ao a riba ana taeka n reirei.

¹² A mamara nanoia i bukina ngke a m'akuri n ai aroia kaaunga, Ao akea ae buokiia.

¹³ A wetea te UEA ngke a kai nanoia, ao E kamaiuia man rawawataia.

¹⁴ E kaotinakoia man te rotongitong, ao E motimotiki kabaeaia.

¹⁵ A riai ni kamoamoa te UEA i bukin ana ataataiaomata, Ao i bukini baike a kamimii ake E karaoi i bukiia.

¹⁶ E uru mataroa aika buraonti, ao E korouai biiti ake kaini kamatoaani mataroa.

¹⁷ A karawaawataaki tem'angina i bukin nanobabaia: B'a a bure ao a bubuaka aroia.

¹⁸ A aikoa kan tara matan te am'arake, ao a kaani mateia.

¹⁹ Ao a wetea te UEA ngke a kai nanoia, ao E kamaiuia man rawawataia.

²⁰ E katoki aorakiia n ana taeka, ao E tuki mateia.

²¹ A riai ni karaoiroa te UEA i bukin ana ataataiaomata, Ao i bukini m'akuri ake a kamimii ake E karaoi i bukiia.

²² A riai n angakarea ni katituaraoi, ao n anene ni kakatonga n tataekin ana m'akuri.

²³ A boborau tem'angina i aoni kaibuke, ni m'akuri iai i bukini maiuia.

²⁴ A noori ana m'akuri te UEA, ake baike a kamimii ake i marawa.

²⁵ E kare te ang ae baibati n ana taeka, ao a tei naoni marawa.

²⁶ A tabekaki rake i aon taubukin naao, ao a manga uotaki rikaaki nakon are i nano. A nako nanoia n te kabuanib'ai are a taonaki iai;

²⁷ A rangaranga ao a bebebebe n ai aron te aomata ae manging, Ao ai akea te bae a kona ni karaoia.

²⁸ Ao a wetea te UEA ngke a kai nanoia, ao E kamaiuia man rawawataia.

²⁹ E katoka te ang ae baibati, ao e ariki, ao e toki marebuni marawa.

³⁰ A kukurei ngke e a raoi; ao E kairiia nakon te ne n rooro are a tangiria.

³¹ A riai ni kamoamoa te UEA i bukin ana ataataiaomata, Ao i bukini baike a kamimii ake E a tia ni karaoi i bukiia.

³² A riai n neboia n tain te bootaki n taromauri, Ao ni kamoamoaa i mataia mataniwiia aia utu nako.

³³ E oniki karaanga b'a rereua, ao koburake n ran b'a taabo aika m'auteretere;

³⁴ Ao te aba ae uaa b'a te raereke ae tarika, i bukin aia bure akana maeka iai.

³⁵ E oniki rereua b'a neei, ao te aba ae m'auteretere b'a koburake n ran.

³⁶ Ao E kamaekaia akana mate ni baki iai, Ao a katea te kaawa iai b'a neia ni maeka.

³⁷ A uniki aroka ma kureebe ni neia, ao a karekei uaa aika bati mai iai.

³⁸ E kakab'aiaia ana Aomata ni kabatiai natiia; Ao E kawakinia aia kao b'a a na aki kerikaki m'aitiia.

³⁹ Ngke a riki b'a taenikai, ngke a kab'ainrangaki n aaro aika a riki n rawaawata ma ni maraki iai,

⁴⁰ Ao E kakeai bonganaia ake a taenikai irouia, Ao E katiotioia nako n rereua, ike akea te kawai iai.

⁴¹ Ma E kamaiuia akana kananoanga man rawawataia, Ao E kabatiaia kaain aia utu, kanga ai aron te nanai ni man.

⁴² A nora aio akana raoiroi ao a kukurei iai, Ma akea aia taeka iai akana buakaka.

⁴³ Ao akana wanawana, ke a iaiangoi baikai; Ke a kareke aia iango n ana ataataiaomata te UEA.