Taian Areru 103 - Te B'aib'ara

Ana Raoiroi te Atua

(Ana Areru Tawita)

¹ N na karaoiroa te UEA ni maiu; ma b'ain nanou ni kabane, karaoiroa arana ae tabu!

² N na karaoiroa te UEA ni maiu, ao N aki m'anuoki ana akoi ni bane.

³ E kab'arai am bure ni kabane; ao E kamaiuko man aorakim ni kabane.

⁴ E kawakina maium man te mate, ao E kakab'aiako n ana tangira ma ana nanoanga.

⁵ E anganganiko baika raraoi ni bongini maium, B'a e aonga n teimatoa marurungin rab'atam kanga ai aron te ikare.

⁶ A raraoi ana motikitaeka te UEA nakoia akana karawaawataaki ni kabaneia, Ao E buokiia ni katei raoi aroia.

⁷ E kaoti ana babaire nakoni Moote, ao ana m'akuri ni kamaiu nakoia Iteraera.

⁸ E nanoanga te UEA ao E tatangira; E iremwe n un ao E on n te Tangira ae Teimatoa.

⁹ Tiaki n ae E na teimatoa arona ni boaa te aba, Ke e na reiti nako unna n akea tokina.

¹⁰ E aki kareke kaira n ai aron ae bon riai n reke nakoira, Ao E kaboi mwin ara bure ma ara kairua n tiaki booia ni koaua.

¹¹ Rababan ana tangira te UEA kanga ai aron rietaatani karawa mai aon te aba.

¹² Raroani mainiku mai maeao, kanga ai aron raroan ara bure ni kam'awaki mai roura iroun te UEA.

¹³ Aron te karo n ataataiaomata nakoia natina, Ao ai aron naba te UEA n ataataiaomata nakoia akana karinea.

¹⁴ E atai aroni karikara; E ataira ae bon te bubu n tano ngaira.

¹⁵ Ngaira aika aomata, kanga ai aron te uteute. Ti rikirake ni maiu raoi kanga ai aron te uee:

¹⁶ E ukaki n te ang, ao e ubara nako e aki manga noraki.

¹⁷ E teimatoa ana ataataiaomata te UEA nakoia akana karinea; Ao E teimatoa arona n raoiroi nakon te rorona ma te rorona

¹⁸ irouia ake a kakaonimaki nakon ana boraraoi, Ake a teimatoa n ongeaba nakon ana taeka.

¹⁹ E kaaki ana kaintokanuea te UEA i karawa; E uea i aoni b'aai ni kabane.

²⁰ Karaoiroa te UEA, ngkami aika anera aika kam korakora, Aika kam ongeaba nakon ana taeka ao kam ongora n te bae E taekinna.

²¹ Karaoiroa te UEA, ngkami akana kam rangi ni m'aiti kurikuri Akana kam toro i rouna ma n ongeaba i rouna.

²² Karaoiroa te UEA, ngkami akana ana karikib'ai n taabo nako ike E tautaeka iai. N na karaoiroa te UEA ni maiu.