Taian Areru 102 - Te B'aib'ara

Te Tataro N Tain Te Kaangaanga

¹ Te UEA, ongo au tataro, ao ongora ni b'anaan au bubuti!

² Tai karabako mairou n te tai ae I reke iai n te kaangaanga. Katanimaia taningam nako iu, ao bareiko n ongo irou ngkana I weteiko iai.

³ E tabe ni mauna maiu kanga ai aroni bubun te ai; Ao e kabuebue rab'atau kanga ai aron ae I mena n te tabo ni kanaiai.

⁴ I rangi ni mamara kanga ai aron te uteute ae rai; E bua te kan am'arake.

⁵ I korakai ni ngirangira te maraki, ao I a rangi ni bakitaia.

⁶ Ai aron te mannikiba n tiku n ti ngaia n te rereua; I riki n ai aron te man n taabo ni maeka aika uruaki aika akea kaaia.

⁷ I wene n aki mamatu; n ai aron te mannikiba ngai ae tiku n ti ngaia i aon akuun taubukin te auti.

⁸ A taetae n iowawa nako iu taan ribaai ni katoa bong; A kamanena arau b'a aia taeka ni karereanti.

⁹ I kana te mannang kanga te am'arake, ao I rengana nimau n rannimatau,

¹⁰ I bukini bonon nanom ma unim; ao Ko tabekai ni karenakoai.

¹¹ Ai aron te nu ae tabe ni mauna bongini maiu, Ao I rai n ai aron te uteute.

¹² Ma Ngkoe, te UEA, Ko uea n aki toki; Ko na ururingaki irouia rooro nako.

¹³ Ko na teirake ni kaota nanoangaan Tion: B'a e a bo ana tai n akoaki; aio raoi taina.

¹⁴ A kakawaki atiibuna iroura, ngaira aika am Toro; Ao a karika nanokawakira taraani bubun aontanona.

¹⁵ Ane a na maka te UEA botannaomata; a o a na bane uean aonnaba ni maka m'akana.

¹⁶ Ngkana E a manga katea Tion te UEA, Ao E na kaota iai kakannatona;

¹⁷ E na ongo irouia ana Aomata akana kananoanga, Ao E aki ribaai aia tataro.

¹⁸ E na koreaki aei i bukiia te roro ae na roko rimwi, B'a a aonga aomata aika na bungiaki rimwi ni kamoamoa te UEA:

¹⁹ E baraaki te UEA n taratara mani nena ae tabu i eta; E tara aon te aba mai karawa,

²⁰ B'a E na ongora ni kainanoia ake a tauaki b'a buure, Ao b'a E na kainaomataia akana a moti taekaia b'a a na kamateaki.

²¹ Ma ngaia ae e na taekinaki aran te UEA i Tion, Ao E na kamoamoaki i Ierutarem

²² Ngkana a bootaki aomata aika bati man aaba aika kakaokoro n taromauria te UEA.

²³ E kamamaraai n au ririki ni maiu ae I riai ni matoatoa iai; E kakimototoa maiu.

²⁴ Ao I kaangai, Atuau, tai uotai nako ngkai i m'ain ae I kara; te UEA, Ko maiu n aki tootoki;

²⁵ Ko kawenea aan aonnaba ngkoangkoa, ao Ko karaoa karawa ni baim.

²⁶ A na bane ni mauna, ma Ko teimatoa; ane a na mangaingai kanga te kunnikai. Ko onikia kanga ai aron te kunnikai, ao ane a na bane n akea rab'ataia.

²⁷ Ma Ko teimatoa n aki onionikaki; ao akea tokini maium.

²⁸ A na maiu ma te rau natira, ao i aan am tararua a na kawakinaki raoi aia kariki iroum.