Taeka n Rabakau 5 - Te B'aib'ara

Kakaonimaki nakon Buum

¹ Natiu te m'aane, ngkana ko kakauongo raoi nakon wanawanau ma au iangoraoi,

² E na bon riai n iai ana babaaire nanom, ao ko na bon riai n taai nako n ataia b'a tera ae ko riai n taekinna.

³ A karewerewe kaanga ana karewe te manibeeru ana taeka te aine ae e buakaka ao a maranran n ai aroni b'aan te oriwa.

⁴ Ma b'aai ni kabane akana ko karekei man reitakim ma ngaia bon taian boitin aika a maai ao taiani kammaraki.

⁵ Ngkana ko iririia, ao e na kairiko rikaaki nakon aia aonnaba maate.

⁶ E a tia n tibanako kawaina man te kawai are e nakon te maiu ao e aki roko n te ataia.

⁷ Natiu te m'aane, ongora irou ao karaoi b'aai ni kabane aika I taekin.

⁸ Kararoako mairoun te aine ae buakaka! Ko na aki naba kaaniia mataroan ana auti.

⁹ Ane e na mauna karineam ao n tokina ko na bae irouia tabeman aomata aika a iowawa ni kabane bongin maium.

¹⁰ A na anaa am m'ane iruwa ma b'aai ni kabane ake ko a tia ni m'akuri i bukiia.

¹¹ Ao ngkana ko a roko n tokin am bong, ao e na bane korakoran rab'atam, ngkana ko ngirangira

¹² ma n takaarua, “I ribaai taeka n reirei ma kaetakiu!

¹³ I aki kubariia au taan reirei,

¹⁴ ao ngkai I a kab'ainrangaki i mataia aomata nako.”

¹⁵ Ko riai ni kakaonimaki nakoni buum, n ai aron ae ko anaa te ran mani bon oin am m'anib'a.

¹⁶ Ao ko na aki riki b'a kaanga te raanga n ran are a na kareke nimaia mai iai aine nako.

¹⁷ Kaawakiniko i bukin buum ao tai wenenibure ma aine tem'angina.

¹⁸ Ko na kukurei ma buum are ko mare ma ngaiia ngke ko rorobuaka.

¹⁹ Bon te aine ae e tikiraoi mani kakukurei, kaanga ai aron te ria ao ngkoe ko riai n anaa nanona naba i matana ma n tiku n ami tangira ae e nene.

²⁰ Ko na aki karangirangko iroun te aine ae e aki kakaonimaki nakon are bon oin buuna!

²¹ E noori b'aai ni kabane te UEA ao e tarataraira raoi.

²² A m'ane taani bure ni bon oin aia m'akuri ake a tia ni karaoi.

²³ A bua mani mate i bukin nanobabaia ao mamaaran tauan aroia i bon irouia.