Taeka n Rabakau 25 - Te B'aib'ara

Ana Taeka Riki Toromon Tabeua

¹ Aikai riki tabeua ana taeka n rabakau Toromon. A karekeaki katotoia irouia ana mataniwi uean Iuta are Etekia.

² E neboaki te Atua i bukin arona ni kamimii; a neboaki taan tautaeka i bukin kab'arab'araan taiani kamimii.

³ Antai ae e konaa raoi n ataa ana iango te tia tautaeka? A rooti tinanikun karawa ao a ruorikaaki nako kabin aonnaba.

⁴ A riai ni kaitiakaki taian tirewa i m'aain kamanenakiia ni karaoaki iai b'aai aika a boongana.

⁵ A riai ni kanakoaki aomata aika a buakaka i m'aain ae e tautaeka ma te eti te aomata temanna.

⁶ Ko na aki kataia n rangi n taraa ni kakannato ngkana ko tei i matan tia tautaeka.

⁷ E raoiroi riki iroun te tia tautaeka b'a e na katokaa riki nakoam nakon ae ko na kamamaaeaki i mataia ana mataniwi te uea. Kakoaua raoi b'a ko bon eti

⁸ i m'aain ae ko katea temanna n te bowi, b'a ko rawa ni konaaki ao ko kamaamaaeaki.

⁹ Ngkana ko aki konaa ni boraoi n ami iango ma raom temanna, ao tai kabuakaka ana iango raom.

¹⁰ Ane e na kuneaki irouia tabem'aang ao e na bua aomatam iai.

¹¹ Taekinan te taeka ae e eti n taina ae e riai kaanga ai aron te koora ae e tamaroa ae e nneaki n te tirewa.

¹² E raoiroi riki te ongora n taeka n reirei nakon taiani b'ai ni katamaroa aika koora.

¹³ Kaanga ai aron raoiroin te ran ae e m'aitoro n tain te kabuebue te tia uarongorongo ae e kakaonimaki.

¹⁴ E buakaka riki te berita ae e uruaki nakon te nangi ni karau ae e aki uota te karau.

¹⁵ E konaa n anaaki nanon te tia tautaeka ao ni katoka te kangaanga te taeka ae e taotaonaki n nano man tamaroa.

¹⁶ E konaa ni kaorakiko kanakin ana karewe te manibeeru ae e rangi ni m'aiti.

¹⁷ Tai kabatia rokom n aia auti raoraom, b'a ane a na kua iroum mani manga moana ribaakim.

¹⁸ Bukinaia raom boni kaanga ewekaia ma taian ambo ao kabaang ao kainikatebe aika a kakang.

¹⁹ Te rao ae ko aki konaa n onimakinna i nanon tain te kangaanga boni kaanga te maraki ni m'aka ni wii ke te ikoaki ni wae.

²⁰ Te anene nakon temanna ae e rangi ni rawaawata kaanga ai aron kab'aroan te beneka n te ikoaki ae e tangaina matana.

²¹ Anganiia kanaia am kairiribai, ngkana a baki. Anganiia nimaia ngkana a taka.

²² B'a kanga ti te bo ma ikoikotan m'akaro n ai i aon atuuia. Ao ane e na anganiko kaniwangam te UEA.

²³ Ngkai e bon waaki te karau mai meang, ao ai aron naba taeka aika a buakaka b'a a nako man te maraki n nano.

²⁴ E raoiroi riki te mena i tinaniku i taubukin te auti, nakon te maeka ma te ainenum'a ae e meremere n taai nako.

²⁵ Te rongorongo ae e raoiroi mai kiraroa e karekea te marurung kaanga ai te ran ae e m'aitoro ngkana ko taka.

²⁶ Kaanga ai aron karenakoan te maange i nanon te karaanga n ran ae e itiaki te aomata ae e raoiroi ae e kauka te kawai nakoia aomata aika a buakaka.

²⁷ Tai kabatia kanakin ana karewe te manibeeru ke n tangira te neboaki n taai nako.

²⁸ Te aki taotaonaki n nano e na katikuko ma te aki konab'ai kaanga te kaawa ae e buubura ae akea oona.