Taeka n Rabakau 18 - Te B'aib'ara

E Kaairua Nanonakin Te Tia Bure

¹ Bon te nanobaba ae te iangoiko bon tii ngkoe ao ni kakaokoroko ma aomata ake iai te iango raoi irouia.

² Bon akea nanoia aika a nanobaba ni kan reirei ma a rangi ni kan uotaarake aia iango.

³ E uotiko nakon te mamaa ao te b'ainrang karaoan te kaairua.

⁴ Bon te karaanga n ran taeka ni wanawana are e raanga man te koburake n ran ae e nano.

⁵ Bon te kaairua ngkana kam nanona te tia bure ao n totokoa te motikitaeka ae e eti nakon te aomata ae akea ana bure.

⁶ E na kairiko nakon te kangaanga te taetae n nanobaba.

⁷ Taekinan b'aai aika a nanobaba boni kaanga kawenean te b'ai ni kam'ane ni bon manga uruana aromi.

⁸ Bon akea riki ae e kangkang ae ai aron katoongan te winanti! E mauna nako i nanon wiim.

⁹ Bon akea okoron te taningaroti ma karaoan te kakiriwe.

¹⁰ Bon te taua ae e korakora te UEA ike a konaa ni biri nako iai ana aomata ni kamanoia

¹¹ a taku aomata aika a kaub'ai b'a te m'ane bon te oo ae otangaia.

¹² E kairiko te kainikatonga nakon te kamaunaaki; e kairiko te nanorinano nakon te neboaki.

¹³ Bon te waaki n nanobaba ni kamamaa te anga te kaeka i m'aain ae e ongora moa.

¹⁴ E rangi ni buobuoki te kaunga nano ngkana ti aoraki, ma bon akea te buobuoki ngkana ti b'ara n nano.

¹⁵ A bane akana a iangoraoi n tangiria n reirei.

¹⁶ E na kairiko te b'aintangira nakon nooran temanna.

¹⁷ Kam na bae n taku b'a kam a tokanikai n te kabowi ni kaburebure, i m'aain taetaen kaaitaraam.

¹⁸ Te kaiwa bon ngaia teuana kawain katokan taiani kangaanga.

¹⁹ Karekean te iraorao ma ae kam a tia ni kaairua nakoina e boni matoatoa riki nakon uruakan nonon te kaawa ae e buubura.

²⁰ Katamaroai ami taeka ao ane kam na kukurei iai.

²¹ E konaa ni karekea te mate ke te maiu taian taeka! Kaub'arantiko, ao ane kam na manga kang am taeka ni kabane ake kam atong.

²² Kaub'ain te m'aane ae e rangi ni kakaawaki boni buuna— bon te b'aintituaraoi mairoun te UEA.

²³ E na riai ni buubuti te kainano i bukin buokana, ma e konaa te kaub'ai n anga te kaeka ae e tangibuaka.

²⁴ Akea aia buobuoki raoraom tabeman, ma e rena riki ma ngkoe te rao ni koaua nakoia aika bon oin am koraki.