Taeka n Rabakau 16 - Te B'aib'ara

Te Kabanea N Taeka Mairoun Te UEA

¹ Ti kawenei ara babaaire ngaira aika aomata, ma e mena iroun te UEA te kabanea n taeka.

² Ti na taku n ara iango b'a ti atai etin b'aai, ma bon te UEA te tia motikitaeka nakon oin bukin rikin baika ti karaoi.

³ Butiia te UEA b'a E na kakab'aia am babaire, ao e na bon kakororaoa nanona.

⁴ Bon iai bukin b'aai nako aika e karaoi te Atua, e kamaiuia aomata aika a buakaka ti i bukin katuaaeaia.

⁵ E aki tangira te aomata te UEA ae e rangi ni kainikatonga.

⁶ Ngkana ti tangira te Atua ma nanora ni koaua ao a na kab'araaki ara bure; ngkana ti kaota karineana, ao ti na kararoaira man te bure.

⁷ Ngkana ti kakukureia te UEA ao a na bon kan raoraoniira naba ara kairiribai.

⁸ E raoiroi karaoan ae e raoiroi ao kam kainano nakon ae kam aki karaoa ae e raoiroi ao kam kaub'ai.

⁹ Ti karaoi ara babaaire, ma bon te UEA ae e baairei kawaira ake ti na nako iai.

¹⁰ A taetae ma te m'aaka taan tautaeka ao a aki konaa ni kaairua.

¹¹ E tarataraira man noorira te UEA ngkana ti karaoa ae raoiroi ke ni m'am'anaia tem'angina.

¹² E karikia taan tautaeka b'a a na korakora ni karaoan ae e eti. A na riai n ribaa te buakaka

¹³ ao a na tangira karaoan ae e raoiroi ao te koaua.

¹⁴ E konaa n tiringko te tia tautaeka ae e unun. Ma ngaia ae kam na kawanawanai ngkami. Kam na aki kauna temanna.

¹⁵ Ngkana e kukurei te tia tautaeka ma ni kukurei iroum, ao kaanga ai aron manga b'akan te karau, ao kam na maiu.

¹⁶ E rangi n raoiroi b'a kam na wanawana ma ni iango raoi nakon ae kam na kaub'ai.

¹⁷ E tuuki kawai aika a buakaka ana aomata te Atua, ao a kaawakiniia n tarataraa raoi kawaia are a nako iai.

¹⁸ E na bon uruana aromi te kamoamoa ae e bati.

¹⁹ E raoiroi riki ngkana kam nanorinano ao kam kainano nakon ae kam na kaub'ai mani b'aai aika kam anai ma te kairoro.

²⁰ Ngkana kam ataa te b'ai ae kam karaoia, e na mari maium. E kakab'aiaia aomata nako te Atua aika a onimakinna

²¹ Te motikitaeka ae e eti e kakoauaa b'a kam wanawana, ao ngkana kam taetae n akoi, ao kam konaa n reireiia tem'angina.

²² Te iango raoi bon te koburake n ran ae e anga te maiu, ma a katuaaeaki aika a nanobaba ni bon nanobabaia.

²³ Kam konaa ni kairiia tabem'aang nakon nanom ngkana kam wanawana man taetae ma te iango raoi.

²⁴ Ti te bo taeka n akoi ma ana karewe te manibeeru a kakukureiko man anganiko namakinan te korakora.

²⁵ N tabetai te b'ai ae e taraa n raoiroi bon te kawai nakon te mate.

²⁶ Korakorani bakim, boni korakoran am m'akuri.

²⁷ A karaoi iango ni kakiriwe aomata aika akea bonganaia. Ao bon ura naba aia taeka kaanga te ai ae e m'aaka roiroi.

²⁸ E aki raoiroi te maningongoo! E kariki taian namakin aika a buakaka ao e urui reitakiia raao.

²⁹ Kam na aki onimakiniia aomata aika a tiritiri. Ane a na bon kairiko nako ni karaoa te b'ai ae e aki raoiroi.

³⁰ Ngkana iai ae e kakoea matana ke n tenatenai wiina mai akuum, ao e a kaan roko te kangaanga.

³¹ Bon te baunuea ae mimitong te ira ae e iaia ao e kabonganaaki irouia aika a tia ni maiuakina te raoiroi.

³² E raoiroi riki taotaonan unim nakon te riki ni kakannato b'a kam a tia n taua te kaawa teuana n te buaka.

³³ Ti konaa ni karaoi oin ara babaaire nako, ma bon ti te UEA n ti ngaia ae e baairei baika a riki.