Taeka n Rabakau 15 - Te B'aib'ara

E noori B'aai ni kabane te UEA

¹ E karaua te nano ae e un te kaeka ae e nanorinano, ma a kakiriweea te nano taeka aika a kaebuebu.

² A roko taeka aika a wanawana mairouia aomata aika a wanawana, ma a taekinaki taeka aika a nanobaba mairouia aika a nanobaba.

³ E noori b'aai ni kabane te UEA aika a raoiroi ma aika a buakaka.

⁴ Bon taian b'ainaoraki taeka aika a raoiroi, ma taeka ni kewe a konaa ni kaikoaka te aomata.

⁵ Kam na aki nanobaba ao n aki ongotaeka irouia am karo. Kawanawanaingkami! Kariaia kaetakimi.

⁶ A rikirake ni marurung aomata aika a raoiroi, ma a na bua aia b'ai aomata aika a buakaka.

⁷ A karekea te iango raoi taeka ni wanawana; bon akea nanon te b'ai ae a iangoia aomata aika a nanobaba.

⁸ E aki kukurei te UEA n aia b'aintangira aomata aika a buakaka, ma e kakukureiaki ngkana a tataro ana aomata.

⁹ E aki kukurei te UEA irouia aomata aika a karaoa te bure. Ma e tangiria aomata nako aika a karaoa ae e raoiroi.

¹⁰ Ngkana kam rairaki man te kawai ae e raoiroi, ao kam na katuaaeaki; ngkana kam rawa ni kaetaki ao kam na mate.

¹¹ Ngkana e konaa n noori b'aai nako te UEA n aia aonnaba maate, ao e konaa naba n noori nanora.

¹² Akana a b'ainingareia tabem'aang a rawa ni kaetaki, ao a na bon rawa ni buubuti buokaia mairouia akana a iangoraoi.

¹³ E anganiko te moangare te kukurei; ma e konaa ni kamanatuako te nanokawaki.

¹⁴ E ingainga ni kan reireinna b'aai riki tabeua te aomata ane e iangoraoi, ma a b'arua te m'akuri ni baba aomata aika a nanobaba.

¹⁵ E matoatoa maiun te aomata ae e kainano, ma te nano ae e rau boni kaanga ai aron te baka n am'arake ae akea tokina.

¹⁶ E raoiroi riki te ongotaeka iroun te UEA ma am b'ai aika ti tabeua, nakon te maiu ni kaub'ai ao te mangaongao ae e korakora.

¹⁷ E raoiroi riki te am'arake ae e bon tau ae e kanaki ma te tangira nakon te baka n am'arake ae e mena iai te riribai.

¹⁸ Te kakai un e kariki kiriwe aika a bati, ma te tiku n rau e kanakoraoi ngurengure nako.

¹⁹ Te maiu n taningaroti boni kaanga te nakonako n te tabo ae e uarereke ae e kateketeke, ma a nakonako aomata nako aika a kaakaraoa ae e raoiroi n te kawai ae e boraoi.

²⁰ A kakukureia aia karo ataei aika a iangoraoi, ma a rangi n ribaaki irouia ataei aika a nanobaba.

²¹ A uota te kukurei akana a bangab'ai nakoia nanobaba aika akea aia iango, ma a toua te kawai ae e eti aomata nako aika a iangoraoi.

²² A na bane ni kaairua b'aai nako ngkana akea te reirei ae e raoiroi e anai taian babaaire aika iangoaki raoi b'a a aonga n nakoraoi b'aai.

²³ E boni kakukureia aomata nako te anga te taeka n te tai ae e riai.

²⁴ A ira te kawai akana a wanawana ni kabane are e waerake nakon te maiu ao e raroa nako man te mate.

²⁵ E uruaka mwengaia akana a kainikatonga te UEA, ma e kaawakin aia b'ai aine nako aika akea buuia.

²⁶ E ribaai iango aika a buakaka te UEA ma e kukurei n te taeka n akoi.

²⁷ E karika te kangaanga nakon ami utu te mataaib'ai, ma kam na bon kaawakiningkami i bon iroumi ngkana kam rawa ni karaoa te baabakanikawai.

²⁸ A iango moa aomata aika a raoiroi i m'aain ae a kaeka, ma e taetae n akea ana iango ane e buakaka n taekin taeka aika a buakaka.

²⁹ E bon aki konaa n ongo te UEA aia tataro aika a buakaka, ma e kaekai aia tataro aika a ongotaeka i rouna ni kabane.

³⁰ E kakukureiko te ngare ni iraorao, ao e kakorakorako te rongorongo ae e raoiroi.

³¹ E raoiroi te kaetaki ae e kamarurung, ao ngkana kam kariaia, ao kam na wanawana.

³² Kam bon karika te kangaanga nakoim ngkana kam kaaki taian reirei, ma bon te iango ae e raoiroi ngkana kam butim'aai.

³³ E na kawanawanaingkami kaotan karinean te UEA ao e na uota te karineaki nakoim te nanorinano.