Taeka n Rabakau 13 - Te B'aib'ara

Kam na Wanawana ngkana kam raoraoniia aika a wanawana

¹ A kariaia kaetakiia irouia aia karo ataei aika a iangoraoi, ma a aki tabe ma kaetakiia ataei aika a taningabono.

² Kam na anganaki kaniwangami ngkana kam taekin taeka n akoi tabeua, ma a iangoa aron te iowawa ma te maiubuaka ni kabane tabeman aomata.

³ Kaawakina te b'ai ae kam ataia i bon iroumi, ao kam na maiu; te b'arantiko, e na bon urua arom.

⁴ E aoria b'a tao iraua ae kam tangiria, e na bon aki buokingkami teutana te taningaroti, ma e na anganingkami kaniwangam te m'akuri korakora ae e raka i aon are e kam kainanoia.

⁵ E ririiba te m'akuri ni kewekewe te aomata ae e raoiroi, ma a kamamaaea te aba ao a karika te b'ainrang koraki aika a buakaka.

⁶ Maiu i nanon te koaua, ao kam na maiu! Ma e na uruana arom te bure.

⁷ A bakaaea te maiu ni kaub'ai, tabem'aang aika akea aia b'ai ma a bakaaea te maiu ni kainano, tabem'aang aika a m'aiti aia b'ai.

⁸ A na kabooa kamaiuaia aomata aika a kaub'ai, ma bon akea ana kangaanga te aomata ae e kainano

⁹ E teimatoa uran ana taura te aomata ae e raoiroi; ma e waekoa ni mate ana taura te aomata ae e buakaka.

¹⁰ E karika te kangaanga te kamoamoa ae e korakora. Kaiangoraoiko ao kaawakin reireiam.

¹¹ E na waekoa ni bane teutana i mwiin teuana te m'ane ae e reke n tiaki angana; te m'ane ae e reke teutana i mwiin teutana e na bon rikirake man rikirake.

¹² Ko konaa ni kaaorakiko man aki reke ae ko tangiria, ma bon te aroka ae e anga te maiu am iango ae ko tangiria ae e korobukina.

¹³ Ngkana ko aki butim'aea ana reirei te Atua ao ane ko na kab'aka boona; ngkana ko ongotaeka nakon ana kaetieti nako, ao ane ko na anganaki kaniwangam.

¹⁴ Bon te koburake n ran ae a anga te maiu taian reirei aika a iangoaki raoi ao e na buokiko n rawea maium man taiani b'ai ni kam'ane aika a kamaamate.

¹⁵ E neboaki te motinnano ae e raoiroi, ma i aoni kawaia nakon te kabuanib'ai aomata aika akea kanoan aia iango.

¹⁶ Ngkana iai iroum te iangoraoi, ao ko na bon karaoa te m'akuri ae e baaireaki raoi, ma a karaoi aia m'akuri n nanobaba aomata aika a nanobaba.

¹⁷ E konaa ni karaoiroi b'aai ke ni i kabuakakai b'aai nakoimi te aomata ae e na karokoa ami rongorongo.

¹⁸ A na bane n kainano ma ni kamaamaaeaki akana a rawa ni kaetaki; ao a na bane n neboaki akana a kukurei ni kaetaki.

¹⁹ Bon te namakin ae e raoiroi ngkana e reke te b'ai ae kam tangiria, ma e rawa te nanobaba ae e bangab'ai n rairaki nako man te buakaka.

²⁰ Kam na wanawana irouia raoraomi aika a wanawana, ma kam na bon kaikoakaki ngkana kam iririia aika a nanobaba.

²¹ Kam ukoukora te kangaanga ngkana kam bure, ma kam na anganaki kaniwangami ngkana kam maiuakina te raoiroi.

²² Ngkana kam ongotaeka iroun te Atua, ao a na iai ami b'ai tabeua aika kam na katikui i bukiia tibum. Ma ngkana kam aki ongotaeka iroun te Atua, ao ane a na manga anai b'aai ake kam katikui aomata aika a raoiroi maiuia.

²³ E ngae ngkana a raraoi uaan abaia aomata aika a kainano ma ane a na bon keekeweaki naba ni uaan arokaia.

²⁴ Ngkana kam tangiriia ami ataei, ao kam na riai ni kaetiia; ao ngkana kam aki tangiriia, ao kam na aki kaetiia.

²⁵ Ngkana e raoiroi maiumi, ao e na rawata kanam; ao ngkana e aki raoiroi maiumi, ao ane kam na nako ma akea uotam.