Ruuta 4 - Te B'aib'ara

Mareakin Boaati ma Ruuta

¹ Ao e nako Boaati nakon te tabo ni kabowi ni mataroan te kaawa, ao e tekateka iai. Ao e ri rarikina teuare e taekinna ngkoa b'a te kabanea ni kaan ni koraki nakon Erimereka, ao e taku Boaati nakoina, “Raou, nakomai tekateka ikai.” Ma ngaia are, e roko teuarei, ao e tekateka.

² Ao Boaati, e a manga weteia tengaun taani kairiiri n te kaawa, ao n tuangiia b'a a na tekateka naba i rarikiia. Ao ngke a bane n tekateka,

³ ao e taetae nakon ana koraki arei ao e taku, “E a tia n oki ngkai Naomi mai Moaaba, ao e tangiria ni kabooa nako te tawaana are ana b'ai ara koraki are Erimereka,

⁴ ao I taku b'a ko ataa taekana. Ma ngaia are, ngkai, ngkana ko tangiria, ao ko na kabooa i mataia koraki aika a tekateka aikai. Ao ngkana ko aki tangiria, ao ko na tuangai, b'a boni ngkoe ae ko riai moa ni kabooa, ao ngai i mwina.” Ao e taku teuarei, “N na kabooa.”

⁵ Ao e taku Boaati, “E rangi n tamaroa, ma ngkana ko kabooa te tawaana mairoun Naomi, ao ko na kabooa naba Ruuta are kaain Moaaba, are e a tia ni mate buuna b'a e aonga n tiku te tawaana i nanon ana utu teuare e mate.”

⁶ Ao e kaeka te koraki ni kaan arei ni kaangai, “Ngkana arona anne, ao I a aki kani kabooa b'a ngaia a na aki b'aib'ai natiu iai: Ko a kabooa: I aki kani kabooa.”

⁷ N taai akekei, ao a tataneiai Iteraera ni kamatoai mwin aia kabob'ai, ke aia raib'ai ni buutan ana kau te tia kaboonako b'ai n angan te tia kabooi, ni kaotia b'a e a matoa raoi te kabob'ai, ke te raib'ai.

⁸ Ma ngaia are, e taku te koraki ni kaan arei nakon Boaati, “Ko na kabooa, ao e buuta ana kau n angan Boaati.”

⁹ Ao e taku Boaati nakoia taani kairiiri ma koraki ake a roko ikekei, “Ngkami taani kakoaua n te bong aei, b'a I a tia ni kabooa mairoun Naomi b'aai ni kabane ake ana b'ai Erimereka, ma natina ake Kirion ma Maron.

¹⁰ Ao n reitaki ma aikai, ao e a riki ngkai b'a bu Ruuta are kaain Moaaba, are buun Maron.” Aio arona b'a e na tiku te tawaana aei i nanon ana utu teuare e mate, ao e na teimatoa naba arana i buakoia ana utu, ao i nanon ana kaawa. Ngkami taani kakoaua i nanon te bong aei.”

¹¹ Ao a taku taani kairiiri ma ake a roko, “Eng, bon taani kakoaua ngaira, ke E karika buum te Uea, b'a kanga ai aron Rakera ma Reea, ake a kariki natin Iakob'a aika a bati. Ke e reke arom ae riai i Eberata, ao kakannatom i Betereem.

¹² Ke a riki natim ake E na anganiko te Atua iroun te ateiaine aei, b'a kaanga ana utu Bereti are natin Tam'aa ma Iuta.”

Ana Kariki Boaati

¹³ Ma ngaia are, e anaa Ruuta Boaati nakon mwengana b'a buuna. Ao te Atua E kakab'aiaa neierei, ao e bikoukou ma ni karika natina te m'aane.

¹⁴ Ao a taku aine akekei nakon Naomi, “Neboa te Atua, b'a E a tia n anganiko tibum te m'aane are e na kawakiniko. Ke e riki te ataeinim'aane aei b'a te aomata ae kakannato i aon Iteraera.

¹⁵ E bon tangiriko natim, e a tia ni karaoa ae korakora riki nakoia itiman naati m'aane, ao ngkai, e a tia ni bungia tibum are e na anganiko te maiu ae boou, ao e na kawakiniko ngkana ko a kara.”

¹⁶ Ao e anaa te ataei Naomi, ao e taua i m'anokana, ao e riki b'a te tia tob'aia.

¹⁷ Ao ainen ikekei, a arana te ataei b'a Obeta, ao a tuangiia aomata ni kaangai, “E a bungiaki tibun Naomi, ao Obeta bon taman Iete, are taman Tawita.”

^18-22 Ao aikai ana kariki Bereti ni karokoa Tawita: Bereti, e karika Etiron, Etiron e karika Ram, Ram e karika Amminataba, Amminataba e karika Nation, Nation e karika Taremon, Taremon e karika Boaati, Boaati e karika Obeta, Obeta e karika Iete, ao Iete e karika Tawita.