Ruuta 1 - Te B'aib'ara

A M'ananga Erimereka ma ana utu nako Moaaba

¹ E roko te rongo i aon Iteraera ni bong ake ngkoa, i m'ain reken ueana. Ma ngaia are, e m'ananga te m'aane ae arana Erimereka ae kaain te baronga ae Eberata i Betereem i Iuta,

² ngaia ma buuna ae Naomi, ao natina m'aane aika uoman, Maron, ao Kirion, ao a maeka moa i Moaaba tabeua te tai. Ngke a maeka ikekei, ao e mate Erimereka

³ ao e tiku Naomi ma natina m'aane ake uoman,

⁴ ake a iein ma Oreb'a, ao Ruuta ake ainen Moaaba. Tao tebwina aia ririki ikekei,

⁵ ao a manga mate Maron ma Kirion. E a tiku Naomi n akea buuna, ao akea naba natina m'aane.

Irakin Naomi iroun Ruuta nako Betereem

⁶ I mwin te tai ae aki maan, ao e ongo Naomi b'a E a tia ni kakab'aia ana Aomata te Atua, n anga te maiu nakon abaia. Ngaia are e a katauraoi ni kitana Moaaba ma buuia natina.

⁷ Ao a teirake n okira Iuta, ao ngke a tabe n nakonako, ao

⁸ e taku Naomi nakoia, “Kam na okira mwengami, ao tiiku irouia tinami. E na akoingkami te UEA, n ai aromi ngkai kam a tia n akoai ma ake a tia naba ni mate.

⁹ E bia anganingkami te UEA te kona ni manga karekeia buumi b'a kam aonga n tekateka raoi.” Ao e kaboria Naomi ni kabo ma ngaiia, ao ngaiia a uaia n tang,

¹⁰ ao a taku nakoina. “Ti na aki oki, ma ti na iriko nakoia am koraki.”

¹¹ E taku Naomi, “Kam na oki: bukin tera ngkai kam na irai? Iai riki natiu m'aane i birotou ae a na buningkami? Kam na okirii mwengami. Kam taku b'a a na manga reke riki natiu m'aane b'a buumi?

¹² Okirii mwengami b'a I a aki kona ni manga mare b'a I a kara. E ngae ngke I iangoia b'a N na mare n tairiki ma ni karekeia natiu m'aane.

¹³ Kam kona n tataningai ikawaia? Kam nang aki kakarekeia buumi? Tiaki ngaia anne natiu, e aki kona ni karaoaki anne, e a tia n karawawataai te UEA.”

¹⁴ Ao a manga uaia naba n tang. Ao e kaboria Oreb'a ni kabo ma tinani buuna, ao e a okira mwengana, ma Ruuta, e nimta tinan buuna.

¹⁵ Ma ngaia are, e a taku Naomi nakon Nei Ruuta, “E a okiria ana utu ma antina tarim, ao ngkoe ko na okira naba mwengam ma ngaia.”

¹⁶ Ma e kaeka Ruuta; “Ko na tai butiai b'a N na kitaniko. N na iriko nako: b'a ike ko nako iai, ao N na nako iai; Ike ko maeka iai, ao N na maeka iai; am koraki au koraki; ao Atuam Atuau:

¹⁷ ike ko mate iai N na mate naba iai, ao I a taunaki naba iai. Ao ke E kamatoa aei te UEA: b'a ti te mate ae na karaureira.”

¹⁸ Ao ngke e noria Naomi b'a e boni korakora nanon Ruuta ni kan iria, ao e aki manga taetae riki nakoina.

¹⁹ Ao a uaia n airi ni karokoa rokoia i Betereem. Ao ngke a roko, ao a bane kaain te kaawa ni mimiakinia, ao a taku aine; “Naomi aei?”

²⁰ Ao e kaekaia ni kaangai, “Tai aranai b'a Naomi, ma aranai b'a Maara b'a E kamaaia maiu Teuare Moan te M'aaka,

²¹ b'a ngke I kitana ikai ngkoa, ao I bon toamau raoi, ma e a kaokai te UEA n arou aei. Bukin tera b'a kam na aranai b'a Naomi ngkai E kaota ekinakoau, ma karawawataau teuare Moan Te M'aaka?”

²² Ao anne ngkanne aron Naomi ngke e a oki mai Moaaba ma Ruuta are kaain Moaaba, are buun natina. Ao a roko i Betereem ngke e a tib'a moanaki taiakin te b'aare.