Ruka 9 - Te B'aib'ara

A Kanakoaki Uake Tengauni ma Uoman iroun Iesu

¹ Ao E weteia uake tengauni ma uoman Iesu ni botiia, ao E anganiia te m'aaka ao te konaa ni kanakoia taimonio ao ni katoki aoraki naba.

² Ao E kanakoia b'a a na taetaekina uean te Atua ao a na kamaiuia aoraki.

³ Ao E taku nako ia, “Akea te b'ai ae kam na uotia ni m'anangami: akea te oko, akea nen ami b'ai, akea te kariki, ao akea te m'ane; ao kam na aki kauoua ami kabaraaki.

⁴ Ao te auti ane kam rin mani maeka iai, ao kam na manga nako naba maiai.

⁵ Ao n te tabo are kam aki butim'aeaki iai irouia kaaina, ao ngkana kam kitana te kawa anne, ao taei bubun aontano mai waemi b'a te b'ai ni kakoaua nako ia b'a a aki mutiakiningkami.”

⁶ Ao a nako ana reirei ni kawari kaawa nako n tataekina te euangkerio, ao a kakamaiu n taabo ake a roko iai.

E iango n raraoma Erote

⁷ Ao Erote, are e tautaeka i Kariraia, e ongo taekani b'aai ni kabane ake a karaoaki, ao e iango n raraoma, i bukina b'a a taku tabem'aang b'a e a manga uti Ioane mai buakoia maate;

⁸ ao a taku tem'angina b'a e kaoti Eria, ao tem'angina, b'a e a maiu te burabeti nikawai temanna.

⁹ E iango Erote ao e taku, “I a tia ni korea roroan Ioane; ma ai antai teuaei, ae I ongo taekana aikai?” Ao e kani karekea ana tai ni kaitibo ma Ngaia.

E Kaam'arakeia Aomata aika Nimangaa Iesu

¹⁰ Ngke a oki taan tuatua, ao a tuanga Iesu taekani baike a tia ni karaoi. Ao E kairiia ni kaokoroia nakon te kawa are arana Betetaita.

¹¹ Ngke a ataia aomata, ao a ri mwina; ao Ngaia, E butim'aia ao E taekinna nako ia taekan uean te Atua, ao E kamaiuia aomata ake a kainanoa te kani kamaiuaki.

¹² E a kaani bong; a roko uake tengauni ma uoman ao a taku nako Ina, “Kanakoia aomata b'a a na nako ni kaawa ma taabo aika maekanaki i marenaua aika i rarikira b'a a na motirawa ao a na kareke kanaia iai; b'a ae ti a mena ikai n te tabo ae rereua.”

¹³ Ao Ngaia, E taku nako ia, “Kam na anganiia kanaia b'a a na am'arake.” A kaeka ao a taku, “Ae iai i roura e aki raka i aon ae ti nimaai te kariki ao uoman te ika, ma e na tau ti ngkana ti nako ni kabo am'arake i bukiia aomata aikai.”

¹⁴ B'a m'aitiia mm'aane tao nimaua tengaa. Ao E taku nako ia ana reirei, “Katekatekaia ni kurubu aika tao kakanimangauni kaain teuana.”

¹⁵ Ao a karaoa tuangaia, ao a katekatekaia ni kabaneia.

¹⁶ Ao E anai kariki ake nimaai ao ika ake uoman, ao E tara rake nako karawa, ao E kaitaua te Atua ao E urui, ao E anganiia ana reirei b'a a na kaaki i mataia aomata.

¹⁷ A bane n am'arake ao a ngae. Ao ana reirei Iesu, a anai tengauni ma uakora b'aene aika kakanoa n nikiran am'arake ake a tiku.

Ana Kaotioti Betero i bukin Iesu b'a bon te Kristo Ngaia

¹⁸ Ti Iesu n tataro n te tai teuana ngke a roko i Rouna ana reirei; ao E titirakiniia ni kangai, “A taku aomata b'a antai Ngai?”

¹⁹ Ao a kaeka ni kangai, “Ioane are te tia B'abetito; ma a taku tem'angina b'a Eria; ao tem'angina, b'a temanna ae e a manga uti mai buakoia burabeti nikawai.”

²⁰ Ao E taku nako ia, “Ao ngkami, kam taku b'a antai Ngai?” Ao e kaeka Betero ni kangai, “Ana Kristo te Atua Ngkoe.”

²¹ Ao E tuangiia ni kamatoa b'anaana nako ia b'a akea temanna ae a na kaongoa taekan te baerei.

E Kaota Taekani Matena ma Manga-utina Iesu

²² Ao E a manga taku riki Iesu nako ia, “E riai Natin te Aomata b'a E na karawawataaki ao b'a E na ribaaki irouia unimm'aane, ao irouia ibonga ake a kakannato, ma taani koroboki, ao b'a E na kamateaki, ao E na manga uti n te katenibong.”

²³ Ao E taku nako ia ni kabaneia, “Ane kan ri mwiu, ao ke e kakeaa i bon i rouna, ao ke tabetabeka ana kaibangaki n te bong ae koraki, ao ke e irirai.

²⁴ B'a ane kani kawakina maiuna ao e na kabua; ao ane kabua maiuna i buku, ao e na kawakinna.

²⁵ B'a tera te raka ae e na karekea te aomata ngkana e b'aina te aonnaba ae b'anin ao ngaia e kabua maiuna ke e karawawataki?

²⁶ B'a ane mamaa i Rou ao n au taeka, ao E na mamaa naba i rouna Natin te Aomata ngkana E roko ma mimitongina ao mimitongin te Tama ma anera ake a raoiroi.

²⁷ Ma I tuangngkami ma te koaua, b'a iai tabem'aang aika tei ikai aika a na aki mate i m'ain ae a nora Uean te Atua.”

E a Onikaki Iesu i aon te Maunga.

²⁸ Tao wanibong i mwin ana taeka Iesu akekei, ao E kaira Betero ma Ioane ma Iakobo, ao E ararake nako aon te maunga b'a E na tataro iai.

²⁹ Ngke E tabe n tataro, ao E onikaki aron taraan ubuna, ao e riki ni mainaina man raneanea kunnikaina.

³⁰ Ao noria, a taetae ma Ngaia uoman aomata, b'a Moote ao Eria,

³¹ ake a kaoti ni mimitong; ao a taekina matena, are E na kakoroa bukina i Ierutarem.

³² Ao a matu nako Betero ma raona; ma ngke a uti, ao a nora mimitongin Iesu ma aomata ake uoman ake a tei ma Ngaia.

³³ Ao ngke a nako mai Rouna, ao e taku Betero nakon Iesu, “Te Tia Reirei, e raoiroi b'a ae ti a mena ikai; ti a katei um'anrianna aika tenua, b'a teuana i bukim, ao teuana i bukini Moote, ao teuana i bukin Eria.” Ma e aki ata nanon te baere e taekinna Betero.

³⁴ Ngke e tabe n atongi baikai, ao e roko te nang ao e rabuniia nuuna; ao a maaku ngke a mena i buakon te nang.

³⁵ Ao e roko te b'anaa man te nang ae kangai, “Aio Natiu, ae rineaki i Rou. Kam na ongo i Rouna!”

³⁶ Ao ngke e toki te b'anaa, ao E nooraki Iesu b'a ti Ngaia. A aki karongoa ana reirei ake raona, ao akea te b'ai teuana ae a taekinna i bukin te baere a tia n nooria.

E a Kanakoaki te Anti ae Buakaka mai nanon te Ataei ni mm'aane

³⁷ N te bong are i mwina, ngke a tia n ruo man te maunga, ao E kaitibo Iesu ma aomata aika bati.

³⁸ Ao noria, e takaarua te aomata temanna mai buakoia aomata aika bati ni kangai: “Te Tia Reirei, I butiko b'a Ko na nanoanga natiu te mm'aane, b'a bon ti ngaia natiu!

³⁹ Ao noria, e tatauaki iroun te tamnei n te tai teuana ma teuana; ao kinaakin aei, e karinaa teteei ni mm'aane ni katakaruaea, ao e karaoa ae na kaatikitiki iai ni karokoa ae kabungibaware, ao e a tib'a kitanna ngkana e a bon rawata i rouna.

⁴⁰ I butiia am reirei b'a a na kanakoa, ma a aki konaa.”

⁴¹ E kaeka Iesu ni kangai, “Te roro ae akea ana onimaki, ae e bure arona! Maan ra memenau i roumi ao taotaonakin nanou nako imi?” E taku nakon te rorobuaka arei, “Kaira mai natim.”

⁴² Ngke e tabe n roko te teei ni mm'aane, ao te taimonio, e boaketana ao e kaatikitikia. Ao Iesu, E takua te anti are kam'araa, ao E kamaiua te teei ni mm'aane, ao E anga nakon tamana.

⁴³ Ao a bane ni mimi ni m'aakan te Atua. Ao ngke a bane ni mimii aomata ni b'aai ni kabane ake E karaoi Iesu, ao E taku nakoia ana reirei,

E Kaota Taekani Matena Iesu.

⁴⁴ “Kam na kakauongo raoi nakon taeka aikai! ane E nang kam'aneaki Natin te aomata nako nanoni baiia aomata.”

⁴⁵ Ma ana reirei a aki atai nanon taeka akekei, ao a karabaaki mai rouia, b'a a aonga n aki ataia; ao a maaku n titirakinna i bukin taeka akekei.

Antai te Kabanea ni Kakannato?

⁴⁶ Ao e riki te kauntaeka i rouia b'a antai ae kakannato riki i buakoia.

⁴⁷ Ma ngke E atai nanoia Iesu, ao E anaa te teei ao E kateia i rarikina,

⁴⁸ ao E taku nako ia, “Ane m'anea te teei aei n akoia i nanon arau, ao e m'aneai n akoai naba; ao ane m'aneai n akoai, ao e m'anea Teuare kanakomaiai; b'a ane mangori riki i buakomi, ao ngaia ane kakannato riki.”

Ane aki Ekingkami nako ao bon Raomi

⁴⁹ Ao Ioane e kaeka ni kangai, “Te Tia Reirei, ti nora te aomata ae kanakoia taimonio n aram, ao ti katokia i bukina b'a tiaki raora.”

⁵⁰ Ma E taku Iesu nako ina, “Tai katokia; b'a te aomata ae aki rawa nako imi ao bon raomi.”

Kawan Taamaria ae Rawa ni M'anea Iesu n Akoia

⁵¹ Ngke e a kan roko te tai are E nang uotaki rake iai Iesu nako karawa ao E motika nanona b'a E na nako Ierutarem.

⁵² Ao E kanakoia ana taan ua-rongorongo n ri moana; ao a nako, ao a rin ni kawan Taamaria teuana, b'a a na katauraoi b'aai i bukina.

⁵³ Ma a rawa kaain te kawa ni kani m'aneia n akoia i bukin ataakina i rouia b'a ae i aoni kawaina Iesu nako Ierutarem.

⁵⁴ Ao ana reirei, are Iakobo ma Ioane, ngke a ata te baerei, ao a taku, “Te Uea, Ko tangirira b'a ti na kab'aka te ai mai karawa b'a e na kamaunaia?”

⁵⁵ Ma Iesu, E rairaki ao E takuia.

⁵⁶ Ao a nako n te kawa teuana.

Uake a Kan Ira Iesu

⁵⁷ Ngke a tabe ni m'ananga, ao e taku te aomata temanna nakon Iesu, “N na iririko nakon te tabo are Ko na nako iai.”

⁵⁸ E taku Iesu nako ina, “Iai neia ni maeka kameanti, ao ngaoia manin aan-nang, ma akea nen Natin te aomata ae E na kawenea iai atuna.”

⁵⁹ Ao E taku nakon temanna, Ko na irirai, Ao ngaia, e kangai, “Te Uea, kariaiai b'a N na nako moa n tauna tamau.”

⁶⁰ Ma E taku nako ina, “Katikuia maate b'a a na tauniia aia mate; ma ngkoe, ko na nako n tataekina Uean te Atua.”

⁶¹ E a manga taku temanna, “N na iririko, te Uea; ma kariaiai moa b'a N na nako ni kabo ma kaaini mwengau.”

⁶² Ma E taku Iesu nako ina, “Akea ane katokaa baina i aon te b'ai ni kamarau tano n taua ao e tanrikaaki, ae e tau i bukin Uean te Atua!”