Ruka 3 - Te B'aib'ara

E Reirei Ioane are te Tia B'abetito

¹ N ana katengauni ma nima ririki n uea Kaitara Tiberio, ngke e tautaeka Bontio Birato i Iutaia ao Erote i Kariraia, ao Biribo are tarin Erote i Iturea ao i Terakoniti, ao Rutania i Abirene,

² ngke mataniwiia ibonga Annati ma Kaiaba, ao e roko ana taeka te Atua iroun Ioane are natin Takaaria n te rereua.

³ E a nako ngkanne Ioane nakon taabo ake i rarikin Ioretan, n tataekina te b'abetito n rairannano i bukini kab'arani buure;

⁴ n aron are e koreia Itaia are te burabeti n ana boki ngke e kangai, “B'anaan temanna ae takarua n te rereua ni kangai: ‘Kam na katauraoa kawain te UEA; kaeti kawaina nako!

⁵ A bane m'arua ni kaonaki, Ao a na kaboraoaki maunga ma tabuki. A na kaetaki kawai aika kirib'ab'ao, Ao a na kaboraoaki nanoni kawai akana tabukibuki.

⁶ Ao ane a na bane aomata n nora ana kamaiu te Atua!’ ”

⁷ E taku ngkanne Ioane nakoia te koraki n aomata aika bati ake a roko b'a a na b'abetitoaki i rouna, “Ngkami aika buniia naeta!” Antai ae tuangngkami b'a kam na biri nako man te rekenikai ane nangi roko?

⁸ Kam na kariki uaa aika a na kaotia b'a kam a tia n rairi nanomi, ao kam na aki taku i nanomi, ni kangai, Tamara Aberaam: b'a I taku nako imi, E kona te Atua ni karikiia natin Aberaam man atiibu aikai.

⁹ E kaweneaki ngkai te angaraa i rarikini wakaani kaai; b'a te kai ae aki kariki uaa aika raraoi ao e na koreaki n teweaki nako nanon te ai.”

¹⁰ Ao a taku aomata aika bati nako ina, “Tera ngkanne te bae ti riai ni karaoia?”

¹¹ E kaekaia ni kangai, “Ane iai i rouna uoua ana kabaraki, ao ke e anga teuana nakon ane akea ana kabaraki; ao ane iai kanana, ao ke e karaoa naba are e karaoia teuare uoua ana kabaraki.”

¹² A roko naba taan anai taekiti b'a a na b'abetitoaki, ao a taku nakon Ioane, “Te tia reirei, tera ae ti na karaoia?”

¹³ Ao e kaekaia ni kangai, “Kam na aki anaa te taekiti i aoni m'aitin are e a tia ni baireaki nako imi.”

¹⁴ A titirakinna naba tautia ni kangai, “Ao ngaira, tera ae ti na karaoia?” Ao e taku Ioane nako ia, “Kam na aki anaa ana m'ane te aomata n te aro n iowawa ke n te aro ni bukibuki ni kewe, ma a na rau nanomi ni boomi n ami m'akuri.”

¹⁵ Ngke a kaantaninga aomata ao a titiraki i nanoia, “E kona n riki Ioane b'a te Kristo?”

¹⁶ E kaekaia Ioane ni kangai, “I b'abetitoingkami n te ran; ma ae E na roko Teuae kakannato riki nako iu, ae I aki tau b'a N na kab'arai kabaean ana kauniwae; E na b'abetitoingkami n te Tamnei are Raoiroi ao n te ai.

¹⁷ E mena i nanoni baina te b'ai are E na kaokoroi iai uita ma maangen uita, ao E na ikoti uaa n uita nakoni nen ana uita; ma E na kabuoki maangen uita n te ai are aki mamate.”

¹⁸ Ao ana taeka ni kakorakora Ioane aika bati, a tia n riki b'a kawaina n tataekina te euangkerio nakoia Iteraera.

¹⁹ Ao Erote are te tia tautaeka, are e a tia n takuaki iroun Ioane i bukin Nei Eroria are buun tarina ngke e a manga iein ma ngaia ao i bukin ana m'akuri ni kabane ake a buakaka ake e a tia ni karaoi.

²⁰ E a manga raon ana bure aikai ngke e kaina Ioane n te karabuuti.

E a B'abetitoaki Iesu

²¹ Ngke a bane n tia ni b'abetitoaki aomata, ao ngke E a tia naba ni b'abetitoaki Iesu, ao n te tai are E tataro iai ao e kaukaki karawa,

²² ao E ruona aona te Tamnei are Raoiroi n rab'atana ae kanga taraan te taobe, ao e roko te b'ana mai karawa ae kangai, “Natiu ae Ko tangiraki Ngkoe; I kakatonga i Roum.”

Ana Bakatibu Iesu

²³ Ngke E moana ana m'akuri Iesu ao tao ai tenibwi ana ririki ni maiu. Bon natin Ioteb'a Ngaia, n aron aia iango aomata are natin Eri,

²⁴ are natini Matata, are natin Rewi, are natin Mereki, are natin Ianna, are natin Ioteb'a,

²⁵ are natin Matatia, are natin Amota, are natin Naum, are natin Eteri, are natin Nakai,

²⁶ are natin Maata, are natini Matatia, are natin Temein, are natin Ioteb'a, are natin Iota,

²⁷ are natin Ioanan, are natin Reta, are natin Terub'abera, are natin Tearetiera, are natin Neeri,

²⁸ are natini Mereki, are natin Ari, are natini Kotam, are natin Eremotam, are natin Era,

²⁹ are natin Iotua, are natin Erietera, are natin Iorim are natini Matata, are natin Rewi,

³⁰ are natin Timeon, are natin Iuta, are natin Ioteb'a, are natin Ionam, are natin Eriakim,

³¹ are natini Merea, are natini Menna, are natin Matata, are natin Natan, are natin Tawita,

³² are natin Iete, are natin Obeta, are natini Boati, are natin Taremon, are natin Naaton,

³³ are natin Amminataba, are natin Atimin, are natin Areni, are natin Etirom, are natini Bereti, are natin Iuta,

³⁴ are natin Iakob'a, are natin Itaaka, are natin Aberaam, are natin Tera, are natin Naora,

³⁵ are natin Teruka, are natin Reu, are natin Bereka, are natin Ebera are natin Tiera,

³⁶ are natin Kainan, are natin Arebeketiata, are natin Tem, are natin Nooa, are natin Rameka,

³⁷ are natini Metutera, are natin Enoka, are natin Iareta, are natini Maararera, are natini Kenan,

³⁸ are natin Enoti, are natin Teta, are natin Atam, are natin te Atua.