Ruka 13 - Te B'aib'ara

Rairi Nanomi b'a Kam Kawa ni Mate

¹ N te tai naba arei, ao a roko aomata tabeman n tuanga Iesu taekaia I-Kariraia ake e rengan raraaia Birato ma raraani maan ake karea.

² Ao E kaekaia ni kangai, Kam taku b'a a buakaka riki I-Kariraia akekei nakoia I-Kariraia ni kabaneia i bukin ae a kamarakaki n te aro aei?

³ I taku nako imi, A aki! ma ngkana kam aki rairi nanomi, ao kam na bane ni mate n ai aroia.

⁴ Ao tera aroia aomata ake tengauni ma waniman, ake a b'akaraki n te auti ae te taua i Tiroam, ao a mate iai; kam taku b'a a buakaka riki nakoia aomata ni kabaneia ake a maeka i Ierutarem?

⁵ I tuangngkami, A aki; ma ngkana kam aki rairi nanomi, ao kam na bane ni mate n ai aroia.

Te Karaki ni Kabotau ae Taekan te Biku

⁶ Ao E taekina te karaki ni kabotau aei: Iai te aomata temanna ae iai ana biku ae unikaki i nanoni nen ana kureebe; ao e roko b'a e na ukoukori uaana iai, ma akea ae e kunei.

⁷ Ao e taku nakon te tia ribana, “Noria, ai tenua te ririki n nako ae I rooroko iai n ukoukori uaa n te biku aei, ao akea ae I kunea. Ko na koreia ni kab'aka! Bukin tera b'a e na kabanebuakaa te am'arake man te tano?”

⁸ Ao e kaeka ni kangai, “Te uea, Ko na katikua riki teuana te ririki, b'a N na keniken ri rarikina ao N na ribanaia.

⁹ Ao ngkana e kariki uaa n ana tai n uaa, ao e na rangi n raoiroi; ma ngkana e aki, ao ko a kona ni koreia ni kab'akaa.”

E Kamaiuaki te Aine ae e B'aoua Nuukana n te Taabati.

¹⁰ E reirei Iesu ni m'aneabaia I-Iutaia teuana n te Taabati.

¹¹ Ao noria, e mena iai te aine ae iai i rouna te anti ae kaaorakaki i rouna i nanon ririki aika tebwi ma wanua; e b'aoua nuukana ao e aki kona ni kaeta raoi rab'atana.

¹² Ngke E nora neierei Iesu, ao E weteia ao E taku nako ina, “Neiko, ko a kamaiuaki man aorakim.”

¹³ Ao E kaaki baina i aona, ao e a eti ngkekei naba nuukana, ao e karaoiroa te Atua.

¹⁴ Ao e un te tia taua taekani m'aneabaia I-Iutaia iroun Iesu ngke E kamaiu n te Taabati, ao e taku nakoia aomata, “Iai boong aika onoua ake a riai ni karaoaki m'akuri iai; rooko ni boong akanne b'a kam na kamaiuaki iai, ma tiaki n te bong ae te Taabati.”

¹⁵ Ma E kaeka te Uea ni kangai, “Ngkami aika taani m'am'ana te aba! Tiaki kam bane ni kab'arai rooia ami kao ma ami aati mani neia n am'arake n te Taabati ao kam kairiia nako ni kamoiia?

¹⁶ Ao te aine aei, ae natin Aberaam, ae e kabaeaki i nanon tebwi ma wanua te ririki iroun Tatan, tiaki b'a e riai b'a e na kab'araki mani kabaeana aei n te bong ae te Taabati?”

¹⁷ Ngke E atongi baikai, ao a bane ni mamaa te koraki ake a ribaia, ao a bane ni kim'areirei aomata ni b'aai ni kabane ake a moa n raraoi ake a karaoaki i Rouna.

Uaan te M'akeke ao te Iti.

¹⁸ Ao E taku ngkanne Iesu, “Ai aron tera uean te Atua? Ao tera ae N na kabotaua iai ma ngaia?

¹⁹ Ai aron uaan te m'akeke, are e anaia te aomata n unikia ni nen arokana; ao e riki rake, ao e riki b'a te kai ae ab'ab'aki, ao a karaoi neia ni maeka mannikiba i aoni m'aangana.”

²⁰ Ao E a manga taku riki, “Tera ae N na kabotaua iai Uean te Atua ma ngaia?

²¹ Ai aron te iiti are e anaia te aine ao e renganna ma te buraawa ae tao nimabwi te b'auna rawawatana, ao e kabanea ni karikirakea te buraawa.”

Te Mataroa are Wariki

²² Ao E waki nako Iesu i aoni kawaina ri nuukani kaawa ma taabo ake a maekanaki, n reireia aomata. Ni karaoan arei i Rouna, ao E bon tabe n toutoua kawaina nako Ierutarem.

²³ Ao e taku temanna nako Ina, “Te Uea, Ti tabeman akana nang kamaiuaki?” Ao Ngaia E kangai nako ia,

²⁴ Kakorakoraingkami b'a kam na rin n te mataroa are wariki; b'a I taku nako imi b'a a bati aika ukoukora te kan rin iai, ma a aki kona.

²⁵ N te tai naba are e tei rake iai teuare ana auti te auti ni kaina te mataroa, ao ane kam na tei i tinaniku ao kam na karebwerebwea te mataroa, ao kam na kangai, “Te Uea, kaukia nako ira!” Ao ngaia e na kaekaingkami ni kangai, “I aki ata reitakiu ma ngkami!”

²⁶ Ao ngkami, ane kam na kangai, “Ti am'arake ao ti moi ma ngkoe, ao ko reirei i nanoni kawain ara kawa.”

²⁷ Ao ngaia e na kangai, “I tuangngkami b'a I aki ata reitakiu ma ngkami! Naako mai rou, ngkami ni kabaneingkami aika taani karaoa ae buakaka!”

²⁸ Ane kam na tang ao kam na tenai riami ikekei ni kaota ae kam un, ngkana kam nora Aberaam, Itaaka, Iakob'a ma burabeti ni kabaneia n uean te Atua, ao ngkami kam teweaki nako tinaniku.

²⁹ Ao ane a na roko aomata mai mainiku ao mai maeao, mai meaang ao mai maiaki, ao a na karekei neia n tekateka n tain te baka n am'arake n uean te Atua.

³⁰ Ao noria, bon iai aika rimwi ngkai aika na riki n rimoa, ao aika rimoa ngkai aika na riki n rimwi.

A Tuanga Iesu B'aritaio are e Kani Karaoia Erote

³¹ A roko B'aritaio tabem'aang n te tai naba arei, ao a taku nakon Iesu, “Ko na nako maikai, b'a e tangiriko Erote b'a ko na kamateaki!”

³² Ao Ngaia E kangai nako ia, Kam na nako n tuanga te arobeke arei ni kangai, “Noria, I kanakoia taimonio, ao I karaoi m'akuri ni kakamaiu n te bong, aei ao ningabong, ao n te katenibong, N na katia iai au m'akuri.”

³³ Ma I riai ni wakina nako kawaiu n te bong aei ao ningabong, ao n te bong are i mwina; b'a e aki konaki ni kamateaki te burabeti ngkana e aki mena i Ierutarem.

Ana Taeka Iesu i bukin Ierutarem

³⁴ “Ngkami, aika kaain Ierutarem, aika kam aki toki ni kamateia burabeti ao kam karebanaia ake a kanakoaki nako imi! Ai m'aiti ra au kani boboti ngkami, n ai aron te moa aine, ngkana e botiia natina i aani baina, ma kam rawa!

³⁵ Noria, e nang katukaki ami kawa i bon i rouna n aki tabeakinaki. Ao I tuangkami b'a kam na aki manga norai ni karokoa te tai ane kam na kangai, ‘E na karaoiroaki Teuae nako mai n aran te Uea.’ ”