Neemia 9 - Te B'aib'ara

Aia Kab'arabure Aomata I bukin Aia Bure

¹ A bane aomatan Iteraera n aki am'aam'arake ni kauabwi ma auani bongin te kaitiua n nam'akaina, ao a kunnikaiia ni kunnikai aika a raerob'a ao a kaoni atuuia n te baareka ni kaota nanokawakiia.

² A kanakoia taian iruwa b'a a na aki iriia, ngke a ikotaki i bukin kab'araan aia bure ma aia bure aia bakatibu.

³ A tei i nanon tenua te aoa n ongora n ana Tua te UEA ae te Atua, ao manga tenua riki te aoa a manga raraoma i bukin aia bure ao a taromauriia te UEA.

⁴ Ao a tei Ietua, Bani, Katemiera, Tebania, Bunni, Terebia, Bani, ao Kenani i aon te kaintei are i bukiia kanoan Rewi ao a tataro n takaarua nakon te UEA ae te Atua.

⁵ Ao i mwiina, ao a taku kanoan Rewi, Ietua, Katemiera, Bani, Atiabeneia, Oria, Tebania, ao Betaia: “Teirake ao takaarua n nebonebo nakon te UEA, te Atua ae akea tokina! Neboa arana ae e kamimii, e korakora riki nakon ae e konaa ni kab'arab'araaki n te taeka.”

Aia Tataro Aomata

⁶ Bon ti ngkoe te UEA, te Tia karaoa karawa ao taiani itoi ni kabane, te Tia karaoa te aonnaba ao ake a maeka i aona, te Tia karaoa marawa ao b'aai ake a maiu iai. Boni ngkoe boton te maiu, ae e neboaki irouia taian itoi aika a kaoni taiani karawa.

⁷ Boni ngkoe te UEA ae Atuara, are e rinea Aberam ko kairiia mai Ura i B'aburon ao Ko aranna b'a Aberaam.

⁸ Ko karaoa am boraraoi b'a Ko na anga abaia kaain Kanaan ao kaain Eta, kaain Ammon ao Beritaite, ao kaain Iebuti ao kaain Kirekata nakoia ana kariki i bukina ngke e kakaonimaki Ao ngkai, Ko a tia ni kakoroa bukin am berita n aron are Ko boni kaakaraoia.

⁹ Ngke a mena ngkoa ara bakatibu i Aikubita, ao Ko noora rawawataia; Ao ngke a nakon Taari are Uraura, Ko ongo tangiia i bukin buokaia.

¹⁰ Ko ataia b'a a tia Uean Aikubita ao ana mataniwi ma ana botannaomata n kateibuaka nakoia am aomata. Ma ngaia are, Ko karaoi kakai aika a kakamaaku ni kaaitaraia kaain Aikubita ao Ko a manga karekea kinaakim are e bon teimatoa.

¹¹ Ko bwenaua taari are e nano ao a m'ananga am aomata i nanona i aon te tabo ae e m'au. Ma Ko kab'akaia aia kairiribai i nanona, ao a inako rikaaki n ai aron te atiibu ae e rawaawata.

¹² Ko kairiia am aomata ni katoa bong n te nang ae e matenten, ao n te tairiki ko kaotaa kawaia n te ai ae e uram'aaka.

¹³ Ko ruorikaaki i Tinai mai karawa, ao Ko anganiia am aomata tuua ma reirei aika a raoiroi aika a boraoi ma n eti.

¹⁴ Ko mwiokoia b'a a na karinea te Taabati ae e tabu, Ko reireina am toro are Moote b'a e na reireiniia am tua.

¹⁵ Ngkana a baki, ao Ko kanakoa te kariki mai karawa, ao ngkana a taka, ao Ko katiinakoa te ran man te b'a. Ao i mwiina, Ko tuangiia b'a a na taua te aba are Ko a tia ni karaoa am berita ae e matoa iai.

¹⁶ A aki ongotaeka ara bakatibu ake a taningabono a m'aninga taekan taian kakai ake ko a tia ni karaoi i bukiia, ao a iangoia b'a a na okira Aikubita ma ni manga riki naba b'a taian toro.

¹⁷ Ma Ko bon nanoanga ngkoe Atuara ao Ko waekoa ni kab'arai buure; Ko tangira, Ko nanoanga, ao Ko nanorinano. Ma ngaia are, Ko aki konaa n tannako mairouia

¹⁸ e ngae ngkana a karaoa te bouannanti ae katotoongan te kaoteteei ae e rangi ni karawaawatako ngke e kaangai, “Aio te anti ae e kamaiura mai Aikubita.”

¹⁹ I bukin am nanoanga ae moan te korakora ao ko aki roko n te kiitaniia i nanon te rereua. Ko aki toki ni kaiririia n te nang n te ngaina ao n te ai n te tairiki.

²⁰ Am tangira ae e roko raoi boni ngaia ae e reireiniia, ao Ko anganiia te maana b'a a na kanna ao te ran b'a a na nimma.

²¹ Ko kakawakiniia raoi, bon akea te b'ai teuana ae a kai nanoia iai i nanon abwi te ririki. A aki roko n uruaki aia kauniwae, ao a aki roko n te b'ara nanoni waeia.

²² Ko anganiia te konaa ni kataenikaiia uea ma n anai abaia, n reitaki ma uean Etibon are Taion ao uean Batian are Oka

²³ Ko kairiia nakon te aba are Ko a tia ni berita iai nakoia aia bakatibu, ao Ko kakab'aiaia aia botannaomata ma taian aomata ake a aki konaa ni warekaki m'aitiia kaanga itoini karawa.

²⁴ Ao i mwiina, a taua te aba aia bakatibu. Ko buokiia ni kataenikaiia taiani uea ao botannaomata ma ni karaoa are a bon taku nakoia aia kairiribai.

²⁵ A taui taiani kaawa aika a buubura aika a matoatoa ao taabo n ununiki aika a m'aiti taian aroka inanoia; a anai taian auti aika a taubobonga b'aiia, ao ai uana naba ma taiani nne n ran, ma taian nne n aroka ni kureebe, nne n aroka n oriwa, ao taian aroka aika a rangi ni m'aiti aika iai uaaia. A am'arake ni karokoa ngaeia raoi, ao a karaoa aia bootaki ni kukurei i bukin am kakab'aia ae moan te korakora.

²⁶ Ma e ngae n anne, ao a bon kakaitaraa naba ma n aki ongotaeka nakon am tua. A tiringiia am burabeti ake a aki toki ni kaakauringiia b'a a na rairaki nakoim, ao a karereantia aram.

²⁷ Ma ngaia are, Ko anga ngaiia nakoia aia kairiribai, ake a karaoa te m'akuri ae moan te buakaka nakoia. A buubuti buokaia mai i buakon rawawataia. Ko kakauongo nakoia mai karawa nakon aia tataro ko kanakoia taani kairiiri b'a a na kamaiuia i bukin am nanoanga ae e korakora,

²⁸ Ma ngkana a mena i nanon te rau, a na manga rairaki ni kaaitarako, ao Ko na anga ngaiia nakoia aia kairiribai. Ao i mwiina, ane a na buubuti buokaia, ao Ko na kamaiuia n te tai teuana ma teuana i bukin korakoran am nanoanga.

²⁹ Ko kauringiia b'a a na rairaki nakoim ao a na kunea te maiu ni koaua ngkana a ongotaeka nakon am tua nako. Ma a bon rangi n rawa ao a teimatoa ni kaakaraoa te bure.

³⁰ Ko teimatoa n taotaona nanom, ao Ko kauringiia n Tamneim n ririki aika a m'aiti n am rongorongo ake Ko taekin rinanoia am burabeti. Ma a bon teimatoa naba n rawa n ongo, ao Ko anga ngaiia nakoia aia kairiribai.

³¹ Ma Ko bon nanoanga man akoi, ma ngaia are, Ko aki roko n te m'aninga taekaia ke ni kamaunaiia.

³² Atuara, ko bon rangi ni korakora, ko mamaakaki, ao ko kakaonimaki, ao ko b'aab'aina te koaua n am taeka. Ma ngaia ae, ti butiiko b'a ko na ururinga rawawataia am aomata, am uea, am taani kairiiri am burabeti, ao am burabeti ae moan te korakora, man te tai are e tautaeka iai Aturia ni karokoa te bong aei.

³³ Ko a tia ni kaakaraoa ae e eti ngkana ko katuaaira i bukin ara bure.

³⁴ A tia ara uea, ara taani kairiiri, ao ara ibonga n aki ongotaeka nakon am tua ke n ongotaeka nakon am kauring nako.

³⁵ Ko kakab'aiaia ma te abanuea n te kaub'ai, ao marin te aba ae moan te korakora ma a bon rawa naba n taromauriiko ke n rairaki nako man te buakaka.

³⁶ Bon tooro ngaira ngkai n te aba ae e korakora uaana aei ae Ko a anga nakoia ara bakatibu.

³⁷ A anaaki uaan kaai aika a m'aiti irouia uea ake Ko kamenakiia i aora i bukin ara bure. Ti aki konaa ni keiakin rawawatara, i bukina ngke a boni karaoa are a tangiria ni karaoia nakoira ma ara nanai ni man.

Karaoan Te Berita Irouia Aomata

³⁸ Ma ngaia are, e a karaoaki te berita ae e kab'aataki irouia taani kairiiri, kanoan Rewi, ao taiani ibonga.