Neemia 5 - Te B'aib'ara

Tabetaben Nanon Neemia Irouia Kainano

¹ Ao a ngurengure tabeman m'aane ma buuia i bukiia I-Iutaia ake iai m'aakaia

² ao a taku, “A rangi ni buubura ara utu nako, ao bon moan te korakora m'aitin te uita ae e na kamaiuia.”

³ Ao a taku ake tekorakina, “Inanon tain te rongo ao ti bon anga naba ara tawaana, nnenaroka ni kureebe, ao a ara auti nakoia b'a ara kabomwi i bukin ara roun b'a ti aonga ni konaa ni kabooi taiani uita.

⁴ Ao a taku ake tekorakina, “Ti riai n tangoa te m'ane mairouia ake iai te m'aaka irouia i bukin kab'akaan te taekiti i bukin ara tawaana ao ara nnen aroka ni kureebe.

⁵ Bon I-Iutaia naba ngaira n ai aroia, ao bon ti te bo naba raoiroia ara ataei ma aia ataei. Ma ti bon kaakabooi nako ara ataei b'a taian toro, ao a tia n tauaki natira aine tabeman. Bon akea buokara; ao a tia naba n anaaki mairoura ara tawaana ma nnen arokara kureebe.”

⁶ Ao ngke I ongo ngurengureia ma aia boo, ao I a rangi n un.

⁷ Ma ngaia are, I a manga karaua ni iangoia, ao I taku nakoia taani kairiiri ao mataniwi, “Kam na kanga n tuangiia aika bon ami aomata b'a a na kab'aka te raka nakoimi?” Ma ngaia are, I a tewea te maungatabu ao I bukiniia taani kairiiri

⁸ ni kaangai, “Ti a tia ni kataia ni kabooia ni kaokiia ara aomata ake a kaboaki nako nakon te kataenikaiaki. Ma ngaia are ai ngkami aikai, aika kam a manga kabooi nako riki tabeman b'a ti aonga ni manga kabooia ni kaokiia!” Bon akea te b'ai ae a taekinna taiani mataniwi ao taani kairiiri, i bukina b'a a bon ataia b'a e bon koaua.

⁹ Ao I reitanako au taeka ao I taku, “E bure te b'ai ae kam a tia ni karaoia! Ti na karinea Atuara n arora ni maiu, b'a a aonga tientaire n aki noora te kaairua iroura.

¹⁰ I bon anga naba te m'ane ao te uita ngai ma au koraki ao raoraou, ma ti na aki tangira boona.

¹¹ Kam na kaoki taian tawaana ngkai, nnenaroka ni kureebe, nnenaroka n oriwa, ao taian auti ake kam a tia n anai ao taiani bakao ake a tia ni kab'akaki nakoimi.”

¹² Ao a taku taani kairiiri, “Ti na karaoi b'aai ni kabane akana ko taekin ao ti na kaoki aia b'ai, ao ti na aki tangiri booia.” Ma ngaia are, I tuangiia taani kairiiri b'a a na berita i mataia ibonga b'a a na kaoki aia b'ai aomata.

¹³ Ao i mwiina, I kabaabanea kanoan au buua ao I taku, “Ngkana kam aki kakororaoa ami berita, ao anne te b'ai ae e na karaoia te Atua nakoimi. E na kabanei ami b'ai ni kabane akana iroumi ni kanakoi, ao e na bon uoti nako naba ami auti.” Ao a taku aomata, “Ti na kakoroi raoi bukin ara berita.” Ao i mwiina, a neboa te UEA ao a karaoi baike a tia ni berita iai.

Ana Atataiaomata Neemia

¹⁴ Bon te kowana ngai i aon Iuta man ana kauabwi n ririki ni uea Atatokititi ni karokoa te katenibwi ma uoua n ririki. Ao i nanon ririki aika tebwi ma uoua aikai, ao I rawa ngai ma au koraki ni kang am'arake ake kanan te koowana.

¹⁵ Taian kowana ni kabane ake i m'aaiu a bon karawaawataia aomata ni karaoia aomata b'a a na kabooi kanaia ma nimaia ao a tangira abwi te m'ane te tirewa ni katoa bong. Ao bon taian mataniwi naba aika a karawaawataia aomata. Ma I karinea te Atua, ao I taku b'a e aki riai te karawaawataia aomata.

¹⁶ I kabanea au tai ni manga karaoa te oo ao I aki kabooi taiani b'ai mairouia aomata. A bane naba aomata ake raou ni karaoa are I karaoia.

¹⁷ I aki toki ni kakaam'arakeia tebubua nimangaun aika bon oin au aomata aika I-Iutaia ma aia taani kairiiri, n reitaki ma ianena ake a roko man aaba ake i rarikira.

¹⁸ E katauraoaki temanna te kao, onoman taian tiibu aika a rangi n tamaroa, ao taiani moa aika a rangi ni m'aiti n teuana te bong. Ao e rooroko te wain ae moan te korakora ni katoa tebwina te bong, I ataia b'a bon te uota ae e rawaawata aei nakoia aomata, ma ngaia are, I aki tangira bakaon te am'arake n aroia koowana.

¹⁹ I tataro b'a e na kakab'aiaai te Atua ni b'aai ni kabane ake I a tia ni karaoi nakoia au aomata.