Neemia 4 - Te B'aib'ara

Ana Kairiribai Neemia

¹ Ao ngke e ongo Taneb'arata are te kowana i Tamaria b'a e a manga karaoaki oon Ierutarem, ao e rangi ni maraki nanona ao e a moana kaunakiia aomata.

² Ao e taku i mataia raoraona ao ana taanga ni buaka Tamaria, “Tera ae a kataia ni karaoia te koraki ni I-Iutaia aika a mamaara aikai? Tao a taku b'a a konaa ni karaoa te b'ai man taiani b'ariko n atiibu aikai?”

³ E tei Tobia are kaain Ammon i rarikin Taneb'arata ao e taku, “Ani bon noora aron aia kateitei! Tera ae a karaoia, ngkana tao e kab'aka aia atiibu aikai te kameanti ao a b'aka naba.”

⁴ Ma I tataro ni kaangai, “Atuara, a ribaira te koraki aikai ao a tangiria b'a ti na taonaki n taiani kangaanga. Taiaoka kaekaa ara tataro ao kaoki aia taeka nakoia! Ko na karaoia b'a koraki ake a na uotaki nako b'a taian taenikai n te buaka.

⁵ Ko na aki m'aninga aia taetae aika a kamaraki ao m'akuri aika a buakaka aika a tia ni kamarakiia iai taani kateitei.”

⁶ A rangi ni m'akuri korakora aomata, ao ti a tia ni manga karaoa iteran oon Ierutarem.

⁷ Ao a rangi n un Taneb'arata, Tobia, kaain Arabia, kaain Ammon, ao kaain te kaawa are Atitota ngke a nooria b'a e a waaki nako karaoan te oo ao a tia ni bonotaki taian b'angab'anga

⁸ ao a iangoia b'a a nang karika te kiriwe, ma ni buakaniia kaain Ierutarem.

⁹ Ma ti bon teimatoa n tataro nako Atuara, ao ti kauateiia taan tei n te bong ao te ngaina.

¹⁰ Ao i nanon te tai arei, ao a anenea te anene n nanokawaki kaain Iuta: “A m'aiti taian atiibu aika uruaki aika ti na katiki! Ti a kua ao ti a kainano, ti nang aki konaa ni katiaa te oo?”

¹¹ A taku ara kairiribai, “I m'aain ae a ataa te b'ai ae e na riki I-Iutaia aikai, ao ti na bakairaaia n tiringiia ma n katoka aia m'akuri.”

¹² E raka i aon tebwina aia bootaki Iutaia aika a kakaokoro, ake a maeka i rarikiia kairiribai ake a aki toki n anga te kakauring nakoira i bukin buakanakira irouia man itera nako ake a na buakaniira mai iai kairiribai,

¹³ ao I kanakoia aomata b'a a na teiakina te oo n taabo ake a rangi n rinano ao ake iai naba iai taiani b'angab'anga. I kamenakiia ni kaineti ma aia utu nako, ao a tei ma taiani kabaang ao kainiwai ao kainikatebe ao kanoa ni katebe.

¹⁴ Ao i mwiina, I tarai b'aai ni kabane ao I tuangiia taani kairiiri, mataniwi, ao aomata ni kabaneia ni kaangai, “Kam na aki maakuia ami kairiribai! E korakora te UEA ao e aki konaa ni maaku. Ma ngaia ae, kam na iangoia ao buaka i bukiia ami koraki ao ami ataei, buumi ao mwengami!”

¹⁵ A ataia ara kairiribai ae ti ataa aia m'akuri ni kam'ane nakoira, ma e tuukia te Atua man karaoan aia iango. Ma ngaia are, ti okiri ara m'akuri n te oo.

¹⁶ Ao man te tai anne, ao I kanakoia iteraia rorobuaka n ataei b'a a na m'akuri ao ake te iterana b'a a na tei. Bon iai kunnikaia ni buaka ao iai naba aia kainiwai ao otangaia, ao ai uana naba ma kainikatebe ao kanoa ni katebe. Ao taani kairiiri a buokiia taani m'akuri

¹⁷ ake a karaoa te oo. A bane aomata ake a urakin b'aai ni m'akuri i bukin karaoan te oo ni kamanenai baiia teaina ni m'akuri iai ao are teaina i bukin uotakin te b'ainibuaka.

¹⁸ Ao ai uana naba ma taani m'akuri ake a manga karaoa te oo a karin aia kabaang ni nneia. Ao e tiku i rarikiu te aomata are e na katanga te bu.

¹⁹ Ao I tuangiia aomata ma taiani mataniwi ao taani kairiiri ni kaangai, “E rangi ni marangaranga ara m'akuri, n te aro are ti a rangi ni maaenako.

²⁰ Ngkana kam ongo tangin te bu, ao kawaekoaingkami ni bootaki i rarikiu. E na buokiira te Atua n te buaka.”

²¹ E waaki karaoan te oo irouia taani m'akuri ni katoa bong man te ingabong ni karokoa te tairiki, ao nikiraia a tei ma aia kainiwai.

²² Ao I titirakiniia m'aane ake a tararua te m'akuri ao aia taani m'akuri b'a a na aki otiotinako mai Ierutarem ao a na teiakinna n te tairiki. Ma ngaia are, a teiakina te kaawa n te tairiki ao a m'akuri n te ngaina.

²³ Ao ngai I bon matu naba ma au kunnikai ni m'akuri n te tairiki, ao ai aroia naba au ataei, taani m'akuri, ao ai uana naba ma taan tei. Ao ti aki kakararoaira ma ara b'ai ni buaka.