Neemia 11 - Te B'aib'ara

Aomata Ake A Maeka i Ierutarem.

¹ Ao a maeka taani kairiiri irouia botannaomata ma aia utu i Ierutarem. Ma e ti konaa n reke nnen teuana te utu man nikiran taiani utu ake tebwina, ma ngaia are, a buubutiia te Atua b'a e na kaotia nakoia b'a antai ae e na maeka ikekei.

² Ao i mwiina, a bane aomata n buubutia te Atua b'a e na kakab'aiaia ake a kukurei ni maeka i Ierutarem.

³ Ao tabeman Iteraera, ibonga, kanoan Rewi, taani m'akuri n te tembora, ao aia kariki ana taani m'akuri Toromon a boni maeka ni bon oin abaia n te kaawa are Iuta. Ma a maeka taani kairiiri ma aia utu n te burawinti i Ierutarem.

Te Baronga are Iuta.

⁴ A maeka taani kairiiri ake uoman man te baronga are Iuta i Ierutarem n ikotaki ma aia koraki nako.

⁵ Temanna mai buakoia bon Ataia are natin Utia te m'aane. Ana bakatibu bon Tekaria, Amaria, Tebatia, Maararera, ao Bereti, are natin Iuta te m'aane.

⁶ A maeka i Ierutarem abubua ao onongauni ma waniman m'aane aika a rangi n raoiroi man ana kariki Bereti. Te tia kairiiri are temanna mai Iuta bon Maateia are natin Baruka te m'aane. Ana bakatibu bon Karaote, Ataia, Ataia, Ioiariba, Tekaria, ao Tiera are natin Iuta te m'aane.

Ana Baronga Beniamin

⁷ Teniman man te baronga are Beniamin ake a maeka i aon Ierutarem. Te moan aomata bon Taru are natin Meturam, ao ake tem'angina bon Kabai ao Tarai. Ana bakatibu Taru bon Ioeta, Betaia, Koraia, Maateia, Itiera, ao Ietiaia.

⁸ Botaaia ni kabane bon ruabubua uangaun ma waniman m'aane man te baronga are Beniamin aika a maeka i Ierutarem.

⁹ Ioera are natin Tikeri te m'aane bon te tia kairiiri, ao natin Iuta te m'aane are Atenua bon te kauoman n tia kairiiri n te taanga ni buaka.

Ibonga

¹⁰ Aman taian ibonga ake a maeka naba i Ierutarem. Te moan bon Ietaia; are bon natin Ioiariba te m'aane ao ai taman Iakin.

¹¹ Te kauoman n ibonga are e maeka bon Teraia are natin Irekia te m'aane. Ana bakatibu bon Meturam, Tatoka, Meraiota, ao Aituba, are e a tia ngkoa n riki b'a te ibonga ae e rietaata.

¹² Bootaia ni kabane, bon wanibubua uangaun man ana kaainga ake a m'akuri n te Tembora. Te moan ibonga ni maeka ikekei bon Ataia are natin Ieroam te m'aane. Ana bakatibu bon Beraria, Amti, Tekaria, Batura, ao Marekia.

¹³ Bootan m'aitiia taani kairiiri man te kaainga ake a mena i buakoia ana koraki bon uabubua angaun ma uoman. Te kaaman n ibonga are e maeka ikekei bon Amatitai are natin Atarera te m'aane. Ana bakatibu bon Atai, Metiremota, ao Immera.

¹⁴ Bootan m'aitiia tautia aika a ninikoria man aia kaainga nako bon tebubua uangauni ma waniman ao aia tia kairiiri bon Taberiera are natin Aketorim te m'aane.

¹⁵ Tabeman kanoan Rewi ake a maeka i Ierutarem. Te moan, bon Temaia are natin Atuba te m'aane. Ana bakatibu bon Atirikam, Atiabia, ao Bunni.

¹⁶ Ake i mwiina bon Tiabetai ao Iotabata, ake a tararuaa te m'akuri i tinanikun te Tembora.

¹⁷ Ao i mwiina, Matania are natin Mika te m'aane. Ana bakatibu bon Taberi ao Ataba. E kaira kuaean te tembora Matania i nanon tain te nebonebo. E maeka naba i Ierutarem Bakebukia are ana tia buobuoki. Ao te kabanea, bon Abeta are natin Tiammua, are tibuna te unim'aane bon Karara, ao tibutoruna te unim'aane bon Ierutun.

¹⁸ Bootaia kanoan Rewi ake a maeka n te kaawa are e tabu bon uabubua waningauni ma aman.

Taan Tei N Te Tembora Ao Tabeman Riki

¹⁹ Tebubua itingauni ma uoman taan tei n te tembora ake a maeka i Ierutarem; ao aia taani kairiiri bon Akuba ao Taremon.

²⁰ Ao nikiraia Iteraera, n reitaki ma ibonga ao kanoan Rewi, a maeka ni bon oin abaia ni kaawan Iuta ake tabeua.

²¹ Ma a maeka taani m'akuri ni m'akoron Ierutarem ae e aranaki b'a Obera, ao m'aane ake uoman ake taan tararuaia bon Tia ao Kitiba.

²² Te tia kairiiri irouia kanoan Rewi ake Ierutarem bon Uti are natin Bani te m'aane. Tibuna te unim'aane bon Atiabia, ao tibutoruna te unim'aane bon Matania, ao tibutaratarana te unim'aane boni Mika. Boni kaain te kaainga are Ataba are e tararua te katangitang i bukin te taromauri n te tembora,

²³ ma ngaia are, e babaaireaki aron te katangitang ma taani katangitang n te bongi teuana ma teuana iroun uean Botia.

²⁴ Are e tei i bukiia Iteraera nakon te tautaeka ni Botia bon Betaia are natin Metetabera te m'aane man te kaainga are Tera man te baronga are Iuta.

Kaain Kaawa Ma Kaawa Aika A Uarereke Ake Tabeua

²⁵ A maeka tabeman kaain Iuta ni kaawa aikai: Kiriata-Areba, Ribon, Iekabeteera,

²⁶ Ietua, Morata, Beta-Bereta,

²⁷ Ata-Tuara, Beera-Teba,

²⁸ Tikeraka, Mekona,

²⁹ Enrimmon, Tora, Iaremuta,

³⁰ Tanoa, Aturam, Rakiti, ao Ateka. A bon tekateka raoi n te kaawa ake man Beera-Teba i maiaki ni karokoa te M'arua are Innom i meang.

³¹ A maeka kaain Beniamin ni kaawa aika Keeb'a, Mikemati, Aiia, Betaera kaawa aika a uarereke ake i rarikina nako,

³² Anatota, Nobi, Anania,

³³ Atora, Ram'a, Kitaim,

³⁴ Arita, Teboim, Neb'arata,

³⁵ Rote, ao Ono, ao ai uana naba ma te M'arua are Karaob'ai.

³⁶ Iai tabeua taiani koraki n aomata man kanoan Rewi man te aba are Iuta ake a kanakoaki b'a a na maeka i buakoia aomatan Beniamin.