Neemia 1 - Te B'aib'ara

Ana Tataro Neemia

¹ Bon Neemia ngai ae natin Akaria te m'aane, ao I koroi ni kabane taekan b'aai ake I a tia ni karaoi n te boki aei. Inanon te nam'akaina are Kitirewi n ana kauabwi n ririki Atatokititi n tautaekana Botia, I maeka n ana kaawa ae e buubura are e nonoaki are Tuta.

² Ao ngke e roko tariu are Anani ma tabeman m'aane mai Iuta, ao I titirakinna taekaia Iutaia ake a birinako man te kataenikaiaki i B'aburon. Ao I titirakiniia naba i bukin te kaawa ae e buubura are Ierutarem.

³ Ao a taku nako iu, “Bon iai aia kangaanga aika a m'aiti taenikai aika a okirikaaki. A bon rangi ni b'ainrang ngkai e a uruaki oon Ierutarem, ao a tia naba ni kabuokaki mataroana.”

⁴ Ao ngke I ongo arei, ao I tekateka ao I tang. Ao I tang i nanon tabeua te bong, ao I aki am'arake ni kaotia ae I rangi n nanokawaki, ao I tataro:

⁵ Te UEA ae Atuan karawa, Ko kakannato ao Ko maakaki. Ao Ko bon kaakakoroa bukin am berita nakoia aomata ni kabane akana a tangiriko ma n ongotaeka n am babaaire.

⁶ Bon am toro ngai, ma ngaia ae, I butiiko b'a ko na nanoangaai ao kaekaa au tataro ae I tataro iai ni bong ao ni ngaina i bukiia Iteraera aika a beku i bukim. I a bon tia ni bure ma au utu ao aomata ni kabaneia

⁷ ngke I rineia b'a n na aki ongotaeka iroum ao n aki iri nanon am tua ma am reirei ake ko angan Moote are am toro.

⁸ I butiiko b'a Ko na uringa te berita are Ko karaoia ngkoa nakon Moote. Ko tuangnga ngkoa b'a ngkana ti aki kakaonimaki, ao Ko na kamaenikuniira i buakoia botannaomata ake ianena.

⁹ Ma ko bon taku naba b'a e ngae ngkana ti a rangi n raroa nako ma ngkana ti tanrikaaki nakoim ma ni manga moana ongotaekara n am tua, Ko na kaokiira rikaaki nakon ara tabo are Ko a bon tia n rineia b'a Ko na taromauriaki iai.

¹⁰ Ara UEA, I tataro i bukiia am toro, koraki ake Ko a tia ni kamaiuia ni korakoram ao m'aakam ae e korakora.

¹¹ I butiiko b'a Ko na kaekaa au tataro ao aia tataro am taani m'akuri ake tekorakina aika a kukurei naba ni karinea aram. Ngkana I uota ana wain te uea n te bong aei, ao karaoia b'a e na kukurei irou, ma ni karaoa te b'ai ae n na buubutiia.