Naum 2 - Te B'aib'ara

B'akan Ninewe

¹ E a roko buakanakim Ninewe! E a roko te m'aaka are e a uruko ni kamaerikirikiko. Katauraoi nakon totokoaia ami kairiribai! Tararua te kawai! Tauraoi nakon te buaka!

² (E nang kaoka mimitongin Iteraera te UEA, n ai arona ngkoa i m'aain kurib'aiana irouia ana kairiribai.)

³ Tautia aika kairiribai a uouoti otangaia aika a uraura, ma aia kaboraoi aika a uraura. A tauraoi nakon te buaka! a ura aia kanibuaka n ai aron te ai! A ewewe aia aoti ni kakatauraoi.

⁴ A biriaitua aia kaa ni buaka, i nanon kawain nuukan te kaawa. A ura kaanga tooti. A kia n ai aron te iti.

⁵ A weteaki mataniwi; a tatatata ngke a waerake. A biri aiaia nakon oon te kaawa, ao a katea otangan b'ain uruan te oo.

⁶ A uki mataroa ake i rarikin te karaanga, e a on te bareti ni b'aai aika a kakamaaku.

⁷ E a uotaki nako te ueanaine b'a te taenikai; A tanginiwenei ana aomata n ai aroia taian taobe. Ao a ororoi b'anib'aniia i bukin rawawataia.

⁸ Ai aron te b'aronran man te nnenran ae e uruaki, birinakoia aomata mai Ninewe! E takaruaeakinaki ae e kaangai, “Tei! Tei!” ma akea ae e rairaki n oki.

⁹ A kuriaki tirewa! A kuriaki koora! E onrake te kaawa n te kaub'ai!

¹⁰ E a uruaki Ninewe, e a rereua ao e a kamaroaa! A rannako naano; a ruru bubuaniwae, akea te korakora; a mainarake moaia aomata.

¹¹ E a ngaa ngkai te kaawa are e ab'ab'aki are kaanga ai aron ooia raian, are te tabo ike a kakaam'arakeaki iai raian ataei, ike a nakonako iai te raian m'aane ma te raian aine, ao a mano raoi iai buniia?

¹² E tiringa kanana te raian ao e raebitiia nakoia buuna ma bunna; e kanoaa b'angana n iriko aika a raebitiaki.

¹³ E taku te UEA ae Moan te M'aaka, “Boni Ngai am kairiribai. N na kabuoki am kaanibuaka. A na mate am tautia i nanon te boo ni buaka, ao N na anai b'aai ni kabane ake ko anai mairouia tabem'aang. E na aki manga ongo te aba b'anaan am tia uarongorongo.”